بارہمولہ میں چار منشیات فروش گرفتار

شمالی کشمیر کے ضلع بارہمولہ میں پولیس نے نشیلی ادویات بر آمد کر کے چار افراد کو گرفتار کر لیا ہے۔

ایس ایس پی بارہمولہ عبدالقیوم نے میڈیا سے بات کرتے ہوئے کہا کہ مصدقہ اطلاع موصول ہونے کے بعد بارہمولہ پولیس نے کاروائی کرتے ہوئے بڑی مقدار میں نشیلی ادویات (کوکین) ضبط کر لیا ہے اور اس میں ملوث چار افراد کو گرفتار کیا ہے۔

ایس ایس پی نے مزید بتایا کہ پولیس نوجوانوں کو نشیلی ادویات کی لت بچانے کے لیے کافی اقدامات اٹھا رہی ہے اور پولیس نے اس کے لیے ایک مہم بھی شروع کی ہے۔ اس مہم کو جارے رکھتے ہوئے پولیس نے آج کاروائی کرتے ہوئے بھاری تعداد میں کوکین ضبط کر لیا ہے۔

انہوں نے بتایا کہ اس کے علاوہ چار افراد کو گرفتار کر لیا ہے، ان میں سے تین کا تعلق بارہمولہ قصبے سے ہے جبکہ ایک ضلع گاندربل کا رہنے والا ہے ۔ یہ ملزم کافی عرصے سے منشیات کا کاروبار کر رہے تھے۔ اس ضمن میں پولیس نے مقدمہ درج کر کے مزید تحقیقات شروع کی ہے۔