ضلع بارہمولہ کے تحصیل آفس سوپور میں عوام کے لئے سہولیات میسر نہ ہونے کی وجہ سے مقامی باشندوں نے انتظامیہ کے خلاف غم وغصہ کا اظہار کیا ہے۔
تحصیل آفس سوپور میں بنیادی سہولتوں کا فقدان ہے۔ عوام کے بیٹھنے کے لیے جگہ ہے نہ بیت الخلاء کا بندوبست۔
مقامی باشندوں کا کہنا ہے کہ مختلف سرکاری دستاویزات کی حصولیابی کے لیے انہیں تحصیل آفس جانا پڑتا ہے، تاہم ان کے مطابق ’’تحصیل آفس صرف برائے نام ایک تحصیل آفس ہے۔‘‘ ان کا کہنا تھا کہ معمولی کاغذات حاصل کرنے کے لیے بھی انہیں دارالحکومت سرینگر جانا پڑتا ہے۔
ای ٹی وی بھارت کے ساتھ بات کرتے ہوئے مقامی باشندوں کا کہنا ہے کہ تحصیل دفتر میں لوگوں کو دقتوں کا سامنا کرنا پڑتا ہے۔ ’’مختلف کاموں کے لیے دفتر آنے والی خواتین یا بزرگ شہریوں کے بیٹھنے کا بھی انتظام نہیں۔ یہاں پارکنگ کی سہولیت نہیں۔ پارک میں جنگلی گھاس اور جگہ جگہ کوڑے کے ڈھیر سے یہاں آنے والی عوام کو دقتوں کا سامنا کرنا پڑتا ہے۔‘‘
عوام کا مطالبہ ہے کہ تحصیل آفس سوپور میں عوام کو بنیادی سہولیات کی فراہمی کو یقینی بنانے کے ساتھ ساتھ تحصیل آفس کو بھی فعال بنایا جائے۔
