بجلی کی آنکھ مچولی، پٹن میں عوام کا احتجاج

ضلع بارہمولہ کے پٹن قصبہ کے لوگوں نے بجلی کی غیر ضروری کٹوتی پر تشویش کا اظہار کرتے ہوئے محکمہ بجلی کے خلاف احتجاج کیا۔

شمالی کشمیر کے ضلع بارہمولہ میں پٹن علاقے کے رہائشیوں نے بجلی کی غیر ضروری کٹوتے کے خلاف محکمہ پی ڈی ڈی سمیت ضلع انتظامیہ کے خلاف سخت ناراضگی کا اظہار کیا۔

قصبہ پٹن میں لوگوں نے محکمہ بجلی اور ضلع انتظامیہ کے خلاف بجلی کی سپلائی کے حوالے سے علاقے کو نظرانداز کرنے پر احتجاج کیا۔ انہوں نے کہا کہ ’’بجلی محکمہ کے ملازمین صرف بجلی کی بلیں تقسیم کرتے ہے لیکن علاقے میں بجلی کا کہیں نام و نشان ہی نہیں ہے۔‘‘

احتجاج کر رہے لوگوں نے دعویٰ کیا کہ قصبہ پٹن اور اس کے ملحقہ علاقوں میں گزشتہ کئی روز سے بجلی کی بلاجواز کٹوتی جاری ہے جس کے نتیجے میں لوگوں کو سخت سردیوں میں مشکلات کاسامنا کرنا پڑ رہا ہے۔

انہوں نے الزام عائد کرتے ہوئے کہا کہ ’’محکمہ اپنی مرضی کے مطابق شیڈول مرتب کرتا ہے تاہم شیڈول کے مطابق بھی محکمہ پی ڈی ڈی رہائشیوں کو بجلی فراہم کرنے سے قاصر ہے۔‘‘