شمالی کشمیر کے ضلع بارہمولہ کے سوپور قصبہ سے دس کیلو میٹر دوری پر واقع زنگیر تجر شریف کے طبی مرکز میں بنیادی سہولیات کے فقدان کی وجہ سے مقامی آبادی پریشان ہے۔
مقامی لوگوں کے مطابق زنگیر تجر شریف جغرافیائی اعتبار سے کافی وسیع علاقہ ہے۔ ایک لاکھ سے زائد آبادی پر مشتمل اس علاقے کے لیے یہ پبلک ہیلتھ سینٹر قائم کیا گیا ہے، جہاں نہ ڈاکٹرز ہیں اور نہ ہی بجلی کا انتظام ہے۔
مقامی لوگوں نے حکومت اور ہیلتھ ڈائریکٹر کے خلاف احتجاج کرتے ہوئے کہا کہ ان کے ساتھ سوتیلا سلوک کیا جا رہا ہے۔
لوگوں کا کہنا ہے 'پرائیمری ہیلتھ سنٹر میں نہ پانی ہے، نہ فینسنگ ہے، نہ کوئی الٹرا ساونڈ مشین ہے اور نہ ہی ڈاکٹر موجود ہیں۔ اس طبی مرکز میں ایک ایمبولینس تھی، وہ بھی انتظامیہ نے کسی دوسری جگہ بھیج دی۔'
لوگوں نے کہا کہ مرکزی حکومت سے کافی زیادہ فنڈ واگزار کیا جاتا ہے۔ لیکن اس فنڈ کا صحیح طریقے سے استعمال نہیں ہوتا، جس کی وجہ سے عوام کو شدید مشکلات سے گزرنا پڑ رہا ہے۔