بانڈی پورہ: ویین علاقہ میں صد فیصد ویکسینیشن کا ہدف مکمل

بانڈی پورہ کے وِیین علاقے میں 18 سال سے زیادہ کی عمر کے سبھی افراد کو کورونا وائرس سے محفوظ رکھنے کے لئے ویکسین کے ٹیکے لگوائے گئے ہیں۔

عالمی وبا کورونا وائرس کے دوران فرنٹ لائن ورکرس اپنی جانوں پر کھیل کر لوگوں کو طبی سہولیات فراہم کرنے کے علاوہ دور دراز علاقوں میں جاکر عوام کو کورونا مخالف ویکسین کے ٹیکے لگا رہے رہیں۔

آشا ورکرز، آنگن واڑی کارکنان کے علاوہ شعبہ ہیلتھ اور ایجوکیشن سے وابستہ عملے کی ٹیموں نے بانڈی پورہ کے دور افتادہ علاقے ویین میں پہنچ کر ویکسینشین کے صد فیصد ہدف کو پورا کر لیا۔

دور افتادہ گاؤں میں ٹرانسپورٹ اور سڑکوں کا معقول انتظام نہ ہونے کے باوجود ٹیم نے کئی کلومیٹر کا پیدل سفر کرکے گھر گھر جاکر نہ صرف لوگوں کو ویکسین کے لئے آمادہ کیا بلکہ اس کے متعلق غلط خدشات اور افواہوں سے بھی انہیں باخبر کیا۔

ضلع بانڈی پورہ کا وِیین گاؤں اب ان ٹیموں کی کاوشوں سے ضلع کا پہلا ایسا گاؤں بن گیا ہے جہاں 18 سال سے زیادہ عمر کی پوری آبادی کو کورونا وائرس سے محفوظ رکھنے کے لئے ویکسین کے ٹیکے لگوائے گئے ہیں۔

شعبہ صحت کے افسران کے مطابق ’’شعبہ ہیلتھ سے وابستہ عہدیداروں اور ورکرس نے کافی محنت اور لگن سے کام کرکے صد فیصد ویکسینیشن کے عمل کو ممکن بنایا ہے۔‘‘

اس ضمن میں بلاک میڈکل افسر بانڈی پورہ نے کہا کہ ’’ضلع میں کورونا وائرس کے خلاف جنگی پیمانوں پر کام کیا جا رہا ہے اور اس مہلک وائرس کے پھیلاؤ پر قابو پانے کے لئے ضروری اقدامات اٹھائے جارہے ہیں۔‘‘