محکمہ جل شکتی نے دس سال سے بھی زیادہ عرصہ قبل ضلع بانڈی پورہ کے اشٹینگو، بڈیاری کنہ بٹھی اور گھاٹ علاقوں میں رہائش پذیر ہزاروں نفوس کے لیے واٹر سپلائی اسکیم کے تحت ایک پروجیکٹ کا افتتاح کیا۔
مقامی باشندوں کے مطابق ابتدائی ایام سے ہی پروجیکٹ پر سست رفتاری سے کام انجام دیا جاتا رہا جس کے باعث عرصہ دراز گرزنے کے باوجود مقامی آبادی کو پینے کا صاف پانی مہیا نہیں کیا جا رہا۔
انہوں نے حیرانگی کا اظہار کرتے ہوئے کہا کہ سست رفتاری کے باعث پروجیکٹ پر ابتدائی ایام میں شروع کیا گیا کام بھی خراب ہو چکا ہے۔
انہوں نے محکمہ جل شکتی کے افسران سمیت ضلع انتظامیہ کو تنقید کا نشانہ بناتے ہوئے کہا: ’’متعلقہ حکام ہر بار ایک یا دو مہینوں میں پروجیکٹ کو پورا کرنے کا صرف وعدہ کرتے ہیں، تاہم پروجیکٹ کو مکمل کرنے کے لیے سنجیدہ اقدامات نہیں اٹھائے جا رہے، جس کے سبب مقامی آبادی کو ایک مقامی گندے نالے کا پانی استعمال کرنا پڑ رہا ہے۔‘‘