بانڈی پورہ: حاجن، سوناواری میں 'پولیس پبلک دربار' منعقد

'پولیس پبلک دربار' میں پولیس افسران نے شرکا کو مختلف سماجی برائیوں کا خاتمہ کرنے کے لیے باہمی تال میل کی ضرورت پور زور دیتے ہوئے کہا کہ ’’سماجی برائیوں کا خاتمہ تبھی کیا جا سکتا ہے جب عوام اور پولیس کے درمیان دوستانہ تعلقات قائم ہوں۔‘‘

شمالی کشمیر کے ضلع بانڈی پورہ کے حاجن، سوناواری میں پولیس اور عوام کے درمیان دوستانہ تعلقات کو مضبوط بنانے کی غرض سے ’’پولیس پبلک دربار‘‘ کا اہتمام کیا گیا۔

بانڈی پورہ پولیس کی جانب سے منعقدہ اس پروگرام میں حاجن، سوناواری علاقے سے تعلق رکھنے والے عوامی نمائندوں، ٹریڈرس فیڈریشن کے زعماء، پنچ سرپنچوں کے علاوہ مقامی باشندوں نے شرکت کی۔ ایس ایس پی بانڈی پورہ، ایڈیشنل ایس پی سمیت پولیس کے کئی اعلیٰ افسران بھی پروگرام میں موجود تھے۔

پولیس افسران نے شرکاء کو مختلف سماجی برائیوں کا خاتمہ کرنے کے لئے باہمی تال میل کی ضرورت پور زور دیا۔ پولیس افسران نے کہا: ’’سماجی برائیوں کا خاتمہ تبھی کیا جا سکتا ہے جب عوام اور پولیس کے درمیان دوستانہ تعلقات قائم ہوں۔‘‘

اس کے علاوہ پولیس نے شرکاء کو یقین دلایا کہ بانڈی پورہ پولیس منشیات اور دیگر سماجی جرائم کے خاتمے کے علاوہ امن و استحکام کو برقرار رکھنے کے لئے ان علاقوں کے لوگوں کے ساتھ کندھے سے کندھا ملا کر کام کرے گی۔

بانڈی پورہ پولیس نے عوام سے اس بات کی بھی تلقین کی کہ وہ کورونا وائرس پر قابو پانے کے لئے حکومت کی جانب سے وضع کیے گئے رہنما خطوط اور ایس او پیز پر سختی سے عمل کریں۔