شمالی کشمیر کے ضلع بانڈی پورہ میں کورونا وائرس سے متاثرہ افراد کی تعداد میں کمی واقع ہو رہی ہے- ضلع بانڈی پورہ گزشتہ سال کووڈ-19 کے حوالے سے کافی متاثرہ ضلع تصور کیا جا رہا تھا، تاہم ان دنوں کورونا وائرس کے کیسز میں کمی واقع ہوئی ہے۔
بلاک میڈیکل افسر بانڈی پورہ ڈاکٹر مسرت اقبال کے مطابق یہاں 45 سال سے اوپر کے عمر والے 82 فیصد لوگوں کو ویکسین کا ٹیکہ لگوایا گیا جبکہ دیگر افراد کو بھی ویکسین لگانے کی کوششیں تیزی سے جاری ہے-
انہوں نے میڈیا نمائندوں کے ساتھ بات کرتے ہوئے کہا کہ بانڈی پورہ میں کورونا وائرس کے پھیلاؤ پر دھیرے دھیرے قابو کیا جارہا ہے- ڈاکٹر مسرت اقبال نے بتایا کہ بانڈی پورہ ضلع میں واقع ایک گاؤں گنڈ جہانگیر کو کشمیر کا وہان شہر سے تعبیر کیا جا رہا تھا کیونکہ اس وقت وہ کورونا وائرس کے پھیلاؤ کا مرکز بن گیا تھا تاہم انتظامیہ کی انتھک کوششوں اور عوام کے تعاون سے اس وقت حالات کافی بہتر ہو رہے ہیں۔
یہ بھی پڑھیں: ماحولیات کے عالمی دن پر نوجوانوں کے تاثرات
انہوں نے بتایا کہ ویکسین لگانے کا عمل بھی ضلع میں کافی تیزی سے جاری ہے اور انتظامیہ کی کوشش ہے کہ ضلع میں جلد سے جلد سو فیصد تک لوگوں کو ویکسین کا ٹیکہ لگایا جائے تاکہ کورونا وائرس پر مکمل طور سے قابو پایا جا سکے-