بانڈی پورہ: کووڈ ویکسین سے متعلق آگاہی پروگرام منعقد

ضلع بانڈی پورہ کے سوناواری علاقے میں کووڈ ویکسین سے متعلق منعقد کیے گئے آگاہی پروگرام کے دوران مقررین نے عوام سے افواہوں پر کان نہ دھرنے اور وقت پر ویکسین کرانے کی تلقین کی۔

کووڈ ویکسین سے متعلق درست معلومات کو عوام تک پہچانے کی ضرورت کو سمجھتے ہوئے ایک رضاکار تنظیم ’’احساس انٹرنیشنل‘‘ نے کووڈ ویکسین سے متعلق آگہی پروگرام منعقد کرنے کا سلسلہ شروع کیا ہے ’’تاکہ جموں و کشمیر کے مختلف خصوصا دور دراز علاقوں میں کووڈ ویکسین سے متعلق غلط فہمیوں کو دور کیا جا سکے۔‘‘

اس سلسلے میں رضا کار تنظیم نے سرینگر کے مختلف مضافاتی علاقوں میں کووڈ ویکسین سے متعلق آگاہی پروگراموں کے انعقاد کے بعد منگل کو شمالی کشمیر کے ضلع بانڈی پورہ کے سوناواری علاقے میں بھی ایک جانکاری پروگرام کا اہتمام کیا جس کے تحت لوگوں کو کووڈ ویکسین کی ضرورت اور اہمیت کے حوالے سے جانکاری فراہم کی گئی۔

ذالپورہ، سوناواری میں اس سلسلے میں ایک آگاہی پروگرام کا انعقاد کیا گیا جس میں ماہرین نے لوگوں کو ویکسین سے متعلق پھیلائی جا رہی افواہوں پر کان نہ دھرنے اور ویکسین کرانے کی تلقین کی۔

انہوں نے لوگوں سے ویکسین کی ضرورت اور اس کے فوائد سے متعلق آگاہ کیا اور کہا کہ ’’کورونا وائرس کے مضر اثرات سے محفوظ رہنے کے لئے ویکسین کے بغیر کوئی چارہ نہیں ہے۔‘‘

پروگرام کے دوران شرکاء نے ویکسین سے متعلق نمایاں افواہ کے بارے میں اپنے خدشات ظاہر کئے کہ ’’ویکسین سے خواتین بانجھ پن کی شکار ہوتی ہیں‘‘، جس کے جواب میں مقررین نے ان سبھی خدشات کو دور کرتے ہوئے کہا کہ ’’یہ سب افواہیں اور ویکسین سے متعلق پھیلائی جا رہی بے بنیاد باتیں ہیں۔‘‘

ماہرین نے آگاہی پروگرام میں آئے شرکاء سمیت سبھی لوگوں کو وقت پر ویکسین کی خوراک لینے کی تلقین کی۔