شمالی آسام کے علاقوں میں تنازعہ کے بعد کرفیو جاری

ایودھیا میں رام مندر کی تعمیر کے لیے بدھ کو منعقد بھومی پوجن اور سنگ بنیاد تقریب کا جشن منانے کے لیے شمالی آسام کے ضلع سونت پورمیں کل دیر شام نکالی گئی موٹر سائیکل ریلی کے دوران دو گروہوں کے درمیان تنازعہ کے بعد نافذ غیر معینہ مدت کرفیو جمعرات کو بھی جاری رہا۔

ضلع کے ڈپٹی کمشنر مانویندر پرتاپ سنگھ نے بتایا کہ تیلا مارا اور دھیکیاجلی تھانہ علاقوں میں کل شب سے ہی کرفیو نافذ ہے۔
انہوں نے بتایا کہ اجودھیا میں وزیراعظم نریندرمودی کی جانب سے رام مندر کی تعمیر کے لیے سنگ بنیاد رکھے جانے کے موقع پر جشن منانے کے لیے کچھ لوگوں کا ایک گروپ جب’جے سری رام‘کا نعرہ لگاتے ہوئے موٹر سائیکل ریلی نکال رہا تھا اسی دوران دوسرے گروہ کے ساتھ ان کی جھڑپ ہوگئی۔
انہوں نے کہا کہ اس ریلی کو نکالنے کے تعلق سے کوئی سرکاری اجازت نہیں لی گئی تھی۔جب یہ ریلی تیلمارا کے گورودعا علاقے میں کل دیرشام پہنچی تو دوسرے گروہ کے ساتھ جھڑپ شروع ہوگئی۔مشتعل بھیڑ نے تین موٹر سائیکلوں اور مسافروں کو لے جانے والی ایک گاڑی جو آگ کے حوالے کردیا۔

بعد میں ڈپٹی کمشنر ، ڈپٹی انسپکٹر جنرل پولیس، سپرنٹنڈنٹ پولیس اور دیگر اعلی افسران موقع پرپہنچ گئے۔ ڈپٹی کمشنر اور دھیکیاجلی وتیج پور کے زونل افسران کی گاڑیوں پر بھی تشدد پر آمادہ بھیڑ نے حملہ کرکے کھڑکیوں کو چورچور کردیا اورگاڑیوں کو نقصان پہنچایا۔
اس واقعہ میں متعدد افرادزخمی ہوگئے۔تمام زخمیوں کو تیج پور میڈیکل کالج اور ہسپتال میں داخل کرایا گیا ہے۔واقعہ کے بعد موقع پر سنٹرل ریزرو پولیس فورس کے جوانوں کو تعینات کیا گیا ہے۔صورت حال کشیدہ مگر کنٹرول میں بتائی جارہی ہے۔