بھارت جوڑو نیائے یاترا آسام میں داخل

Bharat Jodo Nyay Yatra continues کانگریس رہنما راہل گاندھی کی قیادت میں بھارت جوڑو نیائے یاترا جاری ہے۔ اس یاترا کے دوران راہل گاندھی نے ناگالینڈ میں مختلف مقامات پر عوام سے ملاقات کرتے ہوئے ان کے مسائل جاننے کی کوشش کی۔

شیوساگر: کانگریس رہنما راہل گاندھی کی قیادت میں کانگریس کی 'بھارت جوڑو نیائے یاترا' جمعرات کو ناگالینڈ سے شیواساگر ضلع کے ہلوتینگ کے راستے آسام میں داخل ہوئی۔ راہل گاندھی نے صبح سویرے ناگالینڈ کے ٹولی سے بس میں سفر دوبارہ شروع کیا اور تقریباً 9:45 بجے آسام پہنچے۔ شیو ساگر ضلع کے علاقے میں پارٹی کے سینکڑوں کارکنوں نے راہل گاندھی کا پرتپاک استقبال کیا، جہاں ریاست میں آٹھ روزہ سفر کے لیے قومی پرچم آسام کانگریس کے رہنماؤں کے سپرد کیا گیا۔

ناگالینڈ میں یاترا کے دوران راہل گاندھی نے عوام سے ملاقات کے دوران کہا کہ وزیراعظم نریندر مودی نے پچھلے نو سالوں میں ناگالینڈ کے سیاسی مسئلہ کو حل کرنے کی ذرہ برابر بھی کوشش نہیں کی اور نہ ہی ناگالینڈ کی عوام کی جانب مرکزی حکومت نے کوئی توجہ دی۔ اس دوران راہل گاندھی نے شمال مشرقی ریاستوں میں مختلف مسائل کو حل کرنے میں ناکامی کا بھی مودی حکومت پر الزام عائد کیا۔

واضح رہے کہ کانگریس رہنما راہل گاندھی کی قیادت میں 6,713 کلومیٹر طویل بھارت جوڑو نیائے یاترا کا 14 جنوری کو منی پور سے آغاز ہوا اور 20 مارچ 2024کو ممبئی میں یہ یاترا اختتام پذیر ہوگی۔ بھارت جوڑو نیائے یاترا آسام میں 25 جنوری تک جاری رہے گی۔ 'بھارت جوڑو نیائے یاترا' کے ذریعہ 15 ریاستوں کے 110 اضلاع کا احاطہ کرنے کا منصوبہ ہے۔