امپھال: ریاست منی پور کے بشنو پور ضلع کے کواکتا علاقے میں بدھ کو ایک پل کے قریب کھڑی ایک ایس یو وی میں بم دھماکہ ہوا، جس کے سبب تین افراد زخمی ہو گئے۔ ذرائع نے یہ اطلاع دی۔ گاڑی کے اندر رکھا بم غالباً ڈرائیور کے نیچے اترنے اور جانے کے بعد پھٹا۔ تینوں افراد اس گاڑی کے قریب کھڑے تھے اور دھماکے سے زخمی ہوگئے جس کے بعد انہیں بشنو پور ضلع اسپتال میں داخل کرایا گیا۔ ہسپتال کے ڈاکٹروں کا کہنا ہے کہ زخمیوں میں سے ایک کی حالت تشویشناک ہے۔ مرکزی وزیر داخلہ امت شاہ نے منی پور تشدد کے سلسلے میں 24 جون کو آل پارٹی میٹنگ بلائی ہے۔
نسلی تنازع سے متاثرہ منی پور میں امن اور معمول کی بحالی کی اپیل کے لیے بدھ کے روز ایک گھوڑا ریلی کا اہتمام کیا گیا۔ تقریباً 100 پولو کھلاڑی گھوڑوں پر سوار تھے جن پر پلے کارڈز تھے جن پر لکھا تھا ہم امن چاہتے ہیں۔ منی پور ہارس رائڈنگ اینڈ پولو ایسوسی ایشن کے صدر ایچ دلیپ سنگھ نے کہا کہ ہمیں ڈر ہے کہ منی پور کی سالمیت خطرے میں ہے۔ اس لیے ہم نے ریلی نکالنے کا فیصلہ کیا ہے۔ ایسوسی ایشن کے نائب صدر این ٹومبی راج نے کہا کہ ریلی گھوڑا فارم سے شروع ہوئی اور امپھال مغربی ضلع کے بڑے علاقوں سے گزری۔ خیال کیا جاتا ہے کہ جدید دور کے پولو کا کھیل منی پور میں شروع ہوا جہاں اسے سگول کنگجی (سگول کا مطلب گھوڑا اور 'کنگجی' لاٹھیوں کا کھیل ہے) کے نام سے کھیلا جاتا تھا۔ منی پور میں میتی اور کوکی برادریوں کے درمیان ایک ماہ قبل ہونے والے تشدد میں 100 سے زیادہ افراد ہلاک ہو چکے ہیں۔