آکسیجن کی فراہمی میں دیری کے سبب 11 کووڈ مریضوں کی موت

آندھراپردیش کے چتور ضلع کے روئیا اسپتال میں پیر کے روز آئی سی یو کے اندر آکسیجن کی فراہمی میں دشواری کے سبب کم سے کم 11 کووڈ۔ 19 مریضوں کی موت ہوگئی۔ چتور کے ضلع مجسٹریٹ ایم ہری نارائنن نے یہ جانکاری دی۔

ایم ہری نارائنن نے کہا کہ آکسیجن سلنڈر کو دوبارہ لوڈ کرنے میں پانچ منٹ لگے، جس سے آکسیجن کی فراہمی کم ہونے سے مریضوں کی موت ہوگئی۔

ہری نارائنن نے کہا کہ آکسیجن کی فراہمی پانچ منٹ کے اندر بحال ہوگئی اور سب کچھ معمول پر آگیا۔ اس کی وجہ سے ہم زیادہ سے زیادہ مریضوں کی موت کو روک سکے۔ تقریباً 30 ڈاکٹروں کو مریضوں کی نگرانی کے لئے فوری طور پر آئی سی یو میں بھیجا گیا۔

ڈسٹرکٹ مجسٹریٹ نے کہا کہ اسپتال میں آکسیجن کی کمی نہیں ہے اور خاطر خواہ فراہمی کی جا رہی ہے۔

وزیر اعلی وائی ایس جگن موہن ریڈی نے اس واقعے پر غم کا اظہار کیا۔ انہوں نے ضلعی کلکٹر سے بات کی اور ہدایت دی کہ واقعے کی تفصیلی جانچ کی جائیں۔ جگن نے عہدیداروں کو ہدایت کی کہ وہ اس بات کو یقینی بنائیں کہ اس طرح کے واقعات دوبارہ رونما نہیں ہوں۔