اے پی کی نئی ریاستی الیکشن کمشنر نیلم سہائے نے ذمہ داری سنبھال لی

آندھرا پردیش کی نئی ریاستی الیکشن کمشنر نیلم سہائے نے اپنی ذمہ داری سنبھال لی ہے۔ آئی اے ایس عہدیدار نیلم سہائے نے چیف سکریٹری حکومت اے پی کے طور پر خدمات انجام دی تھیں اور عہدہ سے سبکدوش ہوگئی ہیں۔

آئی اے ایس عہدیدار نیلم سہائے کو آئندہ پانچ سال کے لئے آندھرا پردیش کے ریاستی الیکشن کمشنر کے طور پر منتخب کیا گیا ہے۔ ان کے پیشرو این رمیش کمار نے پانچ سالہ میعاد کی تکمیل کی اور 31مارچ کو عہدہ سے سبکدوش ہوگئے۔ میڈیا سے بات کرتے ہوئے سہائے نے کہا کہ ان پر بھروسہ کرتے ہوئے گورنر نے ان کو یہ ذمہ داری دی ہے۔

نیلم سہائے نے کہا کہ وہ ادارہ جات مقامی کے آزادانہ، منصفانہ اور غیر جانبدارانہ انتخابات کو یقینی بنانے کے سلسلہ میں کام کریں گی۔ اس نئے عہدہ کی ذمہ داری سنبھالنے کے بعد انہوں نے گورنر سے ملاقات کی۔ سرکاری ذرائع نے کہا کہ انہوں نے ریاست میں ضلع پریشد اور منڈل پریشد کے انتخابات کروانے کے سلسلہ میں گورنر سے بات چیت کی ہے۔

یو این آئی