ریاست کے تین دارالحکومتوں کی تجویز کے خلاف آندھراپردیش کے کسانوں اور خواتین کے ایک وفد نے ریڈی سے سکندرآباد میں واقع ان کی قیام گاہ پراتوار کی دوپہر ملاقات کرتے ہوئے ایک میمورنڈم دیا۔
اس وفد نے کہا کہ 'دارالحکومت امراوتی کی تبدیلی سے ان کو کافی مشکلات کا سامنا کرنا پڑسکتا ہے۔ کشن ریڈی نے ان کی مشکلات اور مسائل کو تفصیل سے سنا۔
ریاست کے کسان، اس مسئلہ پر کئی دنوں سے احتجاج کررہے ہیں۔ ان کا مطالبہ ہے کہ حکومت تین دارالحکومتوں کی تجویز سے فوری دستبرداری اختیار کرے کیونکہ نئے دارالحکومت کے طورپرامراوتی کو انہوں نے نہ صرف قبول کیا ہے بلکہ امراوتی کی تعمیر کے لئے اپنی اراضی حکومت کو دی ہیں۔
کسانوں کے اس احتجاج، دھرنے اور زنجیری بھوک ہڑتال کو اصل اپوزیشن تلگودیشم کے ساتھ۔ ساتھ عوامی تنظیموں، بائیں بازو کی جماعتوں کی حمایت حاصل ہے۔ حکومت کی اس تجویز کے خلاف ریاست میں مختلف شکلوں میں بڑے پیمانہ پر احتجاج کئے جارہے ہیں۔
