آندھراپردیش: ہندو دیوتاوں کی مورتیوں کی بے حرمتی، لوگوں میں ناراضگی

آندھراپردیش کے ضلع مشرقی گوداوری کے پیٹھا پورم میں ہندو دیوی دیوتاوں کی مورتیوں کی بے حرمتی کا واقعہ پیش آیا ہے جس کے سبب علاقے کے لوگوں میں سخت ناراضگی پائی جارہی ہے۔

علاقے کے ایس ستی راجو نامی شخص نے اس سلسلہ میں پولیس میں شکایت درج کروائی جس میں انہوں نے کہا کہ پیٹھا پورم ٹاون کے مختلف مقامات پر مورتیوں کی بے حرمتی کی گئی۔

اس شکایت کے بعد تعزیرات ہند کی مختلف دفعات کے تحت ایک کیس درج کرلیا گیا۔ پیٹھا پورم ٹاون پولیس اسٹیشن کے سب انسپکٹر عبدالندیم اس معاملے کی تحقیقات کررہے ہیں۔

علاقے کے بی جے پی کے رہنما لنکا دیناکر نے اس واقعہ کی مذمت کی اور حکام پر الزام لگایا کہ وہ ریاست میں ایسے واقعات کو روکنے میں ناکام رہے۔

انہوں نے اپیل کی کہ اس واقعہ کے ذمہ داروں کے خلاف کارروائی کرتے ہوئے علاقے میں امن و ہم آہنگی کو برقرار رکھا جائے۔