Wreath laying ceremony of Fayaz Ahmad پولیس اہلکار فیاض احمد سرکاری اعزاز کے ساتھ سپرد خاک

جنوبی کشمیر کے کوکرناگ سے تعلق رکھنے والے پولیس اہلکار قریب گیارہ ماہ تک موت و حیات کی کشمکش میں مبتلا رہنے کے بعد فوت ہوگئے۔ پولیس اہلکار کو سرکاری اعزاز کے ساتھ سپرد خاک کیا گیا۔ Wreath Laying Ceremony of Policeman Fayaz Ahmad

اننت ناگ (جموں و کشمیر) :جنوبی کشمیر کے ضلع اننت ناگ میں کوکرناگ سے تعلق رکھنے والے پولیس اہلکار فیاض احمد، جو گزشتہ برس 12 جولائی کو سرینگر کے لال بازار علاقے میں عسکری حملے میں شدید زخمی ہوئے تھے، قریب گیارہ ماہ زیر علاج رہنے کے بعد زخموں کی تاب نہ لاتے ہوئے فوت ہو گئے۔ پولیس اہلکار کے اعزاز میں گلباری کی تقریب منعقد کی گئی بعد ازاں سرکاری اعزاز کے ساتھ انہیں آبائی علاقہ لوہرسنزی، کوکرناگ میں سپرد لحد کیا گیا۔

کوکرناگ میں منعقدہ گلباری کی تقریب میں ڈی آئی جی آئی آر پی کشمیر، کمانڈنٹ آئی آر پی 10 بٹالین، کمانڈنٹ آئی آر پی 13 بٹالین، کمانڈنٹ آئی آر پی 17 بٹالین، ڈپٹی کمانڈنٹ آف آئی آر پی 10 اور 13 بٹالین، ڈی وائی ایس ایس پی آئی آر پی 10 اور 11 بٹالین ایس ڈی پی او کوکرناگ ایس ایچ او کوکرناگ کے ساتھ ساتھ دیگر پولیس اہلکار موجود تھے۔ گلباری کی تقریب میں علاقے سے تعلق رکھنے والے مقامی باشندوں کی کثیر تعداد نے بھی شرکت کی اور میت پر پھول نچھاور کر کے انہیں خراج عقیدت پیش کیا۔

قابل ذکر ہے کہ 12/07/2022 کو لال بازار، سرینگر میں جی ڈی گوینکا نامی ایک نجی اسکول کے قریب عسکریت پسندوں نے پولیس کی ایک ناکہ پارٹی پر فائرنگ کی تھی جس کے نتیجے میں اے ایس آئی مشتاق احمد ہلاک جبکہ دو پولیس اہلکار زخمی ہوئے تھے جن میں ہیڈ کانسٹیبل فیاض احمد اور ایس پی او ابوبکر شامل تھے۔ فیاض احمد قریب گیارہ ماہ تک موت و حیات کی کشمکش رہنے کے بعد بالآخر اس دنیا سے کوچ کر گیا۔

اے ڈی جی پی کشمیر شری وجے کمار نے جموں و کشمیر پولیس پریوار کی جانب سے ڈیوٹی کے سلسلے میں دی گئی اس عظیم قربانی کے لیے پولیس اہلکار کے اہل خانہ سے دلی ہمدردی اور تعزیت کا اظہار کیا۔ انہوں نے اپنے پیغام میں کہا: ’’ہم شہید کو اس کی فرض شناسی میں دی گئی عظیم قربانی پر زبردست خراج تحسین پیش کرتے ہیں اور اس اہم موڑ پر ان کے خاندان کے ساتھ شانہ بشانہ کھڑے ہیں۔‘‘