اننت ناگ: پانی کے ٹینک میں پھنسا تیندوے کا بچہ نکالا گیا

محکمہ وائلڈ لائف کے اہلکاروں کی ایک ٹیم نے تیندوے کے بچے کو پانی کے ٹینک سے باہر نکال اسے ڈکسم وائلڈ لائف سینکچوری منتقل کر دیا۔

جنوبی کشمیر کے ضلع اننت ناگ کے براکپورہ علاقے میں تیندوے کا ایک بچہ تقریباً 10 فٹ گہرے پانی کے ٹینک میں گر گیا تھا، جسے محکمہ وائلڈ لائف کے اہلکاروں نے بازیاب کر لیا۔

ہفتہ کی صبح ضلع کے براکپورہ علاقے میں مقامی باشندوں نے باغات میں پانی کے ٹینک کے اندر ایک تیندوے کے بچے کو پھنسا ہوا دیکھ کر فوری طور محکمہ وائلڈ لائف کے حکام کو اطلاع دی۔

محکمہ وائلڈ لائف کے اہلکاروں نے موقع پر پہنچ کر ریسکیو آپریشن شروع کر دیا۔

محکمہ جنگلات کی ایک ٹیم نے تیندوے کے بچے کو پانی کے ٹینک سے باہر نکالنے میں کامیابی حاصل کر لی۔

محکمہ وائلڈ لائف کے مطابق تیندوے کے بچے کو ڈکسم وائلڈ لائف سینکچوری منتقل کر دیا گیا ہے۔

واضح رہے کہ تیندوے کی موجودگی سے مقامی لوگوں میں خوف وہراس پھیل گیا ہے، محکمہ وائلڈ لائف کی ٹیم نے چند روز قبل ہی اسی علاقے میں ایک تیندوے کو پکڑ لیا تھا۔