'حکومت کھیل سرگرمیوں کو فروغ دینے کے لیے پیش پیش ہے'

جنوبی کشمیر کے ضلع اننت ناگ میں ضلع انتظامیہ اور محکمہ سیاحت کے اشتراک سے ضلع صدر مقام سے مشہور سیاحتی مقام پہلگام تک سائیکل ریس کا انعقاد کیا گیا جس میں وادی کے مختلف اضلاع سے آئے سائیکلسٹ نے حصہ لیا۔

اننت ناگ ضلع انتظامیہ اور محکمہ سیاحت کے اشتراک سے نوجوانوں کو کھیل کود کی جانب راغب اور سیاحت کو فروغ دینے کی غرض سے ایک سائکل ریس کا انعقاد کیا گیا۔

ضلع صدر مقام سے مشہور سیاحتی مرکز پہلگام تک منعقدہ اس ریس میں وادی کے مختلف اضلاع سے آئے ہوئے نوجوانوں نے شرکت کی۔

اننت ناگ کے ضلع صدر مقام سے شروع ہونے والی اس سائیکل ریس میں صبح سویرے شرکت کرنے والے نوجوانوں میں کافی جوش دکھائی دے رہا تھا۔ تین گھنٹے تک جاری رہنے والی اس سائیکل ریس میں شرکاء کے لیے ضلع انتظامیہ کی جانب سے خاطر خواہ انتظامات کیے گئے تھے۔

وادی کے شمال و جنوب سے سائیکل ریس میں حصہ لینے والے افراد نے قریب 35 کلو میٹر کا سفر سائیکل پر طے کیا، اس دوران خوبصورت اور دلفریب پہاڑوں کے دامن سے گزرتے ہوئے نوجوان ایک دوسرے پر سبقت لینے کی کوشش میں تھے، تاہم وسطی کشمیر کے ضلع بڈگام سے تعلق رکھنے والے نوجوان سائکلسٹ اکبر خان نے پہلی پوزیشن حاصل کی جبکہ دوسری اور تیسری پوزیشن وحید احمد اور باسط احمد نے حاصل کی۔

اختتامی تقریب میں مشیر برائے لیفٹینٹ گورنر بشیر خان نے مہمان خصوصی کے طور شرکت کرکے کھلاڑیوں میں انعامات تقسیم کئے۔

پہلی دوسری اور تیسری پوزیشن حاصل کرنے والے افراد کو بالترتیب 30ہزار، 20ہزار اور 10ہزار روپے کے نقد انعامات سے نوازا گیا۔ وہیں سی آر پی ایف نے خواتین فاتحین میں50000 روپے تقسیم کرکے کھلاڑیوں کی حوصلہ افزائی کی۔

اس موقع پر مشیر برائے گورنر نے تمام شرکا کو مبارکباد پیش کرتے ہوئے کہا کہ ’’حکومت کھیل سرگرمیوں کو بڑھاوا دینے اور کھلاڑیوں کی حوصلہ افزائی کے لئے ہمیشہ پیش پیش ہے۔‘‘

انہوں نے اس طرح کے پروگرام کو کامیابی کے ساتھ منعقد کرنے پر ضلع انتظامیہ اننت ناگ کی کوششوں کو سراہا۔ وہیں سرنل سے پہلگام تک مختلف مقامات پر سائیکل سواروں کی حوصلہ افزائی کرنے پر عوام کی بھی تعریف کی۔

مشیر نے نوجوانوں سے کھیل سرگرمیوں میں بڑھ چڑھ کر حصہ لینے اور منشیات سے رہنے کی بھی تلقین کی۔