اننت ناگ: ہسپتال کے باوجود علاج نہیں

بجبہاڑہ کے سرہامہ علاقہ میں غیر معیاری ادویات اور طبی و نیم طبی عملہ کی کمی کی وجہ سے مریضوں کو مشکلات درپیش ہیں۔

جموں و کشمیر کے ضلع اننت ناگ کے حلقۂ انتخاب بجبہاڑہ میں قائم سرہامہ علاقے میں طبی مرکز قائم ہونے کے باوجود لوگ طبی سہولیات سے محروم ہیں۔ مریضوں کو شدید مشکلات کا سامنا ہے۔

مقامی لوگوں کا کہنا ہے کہ علاقے میں ہسپتال صرف نام کا ہے جبکہ اس اسپتال میں صرف ایک ڈاکڑ تعینات کیا گیا ہے جو صبح 10 بجے سے 4 بجے تک رہتا ہے۔

وادی کے شعبۂ صحت میں کافی ترقی ہوئی ہے، تاہم ابھی بھی لوگوں کو طبی سہولیات کا فقدان ہے۔ سرکاری ہسپتالوں میں بہتر مشینری ہے اور بہترین علاج کی خدمات میسر رہتی ہے۔ تاہم سرہامہ کے پی ایچ سی اسپتال میں مشینری کی کمی ہے جس کے باعث بیمار مشکلات سے دو چار نظر آرہے ہیں۔

مقامی لوگوں نے الزام عائد کیا ہے کہ علاقے میں اسپتال کی بڑی بلڈنگ تعمیر تو کی گئی لیکن ڈاکڑوں کی عدم دستیابی سے اس بلڈنگ کا ہونا نہ ہونے کے برابر ہے۔

مقامی لوگوں کا کہنا ہے کہ 'جب علاقے میں کوئی ایمرجنسی آ جاتی ہے تو ہمیں اننت ناگ ڈسڑکٹ ہسپتال یا سرینگر ہسپتال جانا پڑتا ہے۔ کئی بار گاؤں میں طبی سہولیات کے فقدان سے بہت سارے لوگوں نے جان گنوائی ہے۔'

اس سلسلے میں جب ای ٹی وی کے نمائندہ نے بلاک میڈیکل آفسر محمد اقبال بیچو سے بات کی تو اُنہوں نے اس تعلق سے کچھ بھی کہنے سے گریز کیا۔