داؤدپورہ وائلو بنیادی سہولیات سے محروم

مقامی لوگوں نے محکمہ دیہی ترقی سے مطالبہ کیا ہے کہ ان کے علاقہ میں رابطہ سڑکوں اور علاقہ سے بہنے والے ندی نالوں پر تعمیراتی کام شروع کیا جائے تاکہ مقامی لوگوں کے لئے روزگار کے وسائل ہموار ہو جائیں۔

جموں و کشمیر کے ضلع اننت ناگ کے تحصیل مقام کوکرناگ سے محض سات کلومیٹر کی دوری پر واقع داؤدپورہ وائلو نامی علاقہ انتظامیہ کی نظروں سے اجھل ہے۔ علاقہ میں رابطہ سڑک جیسی بنیادی سہولت کا فقدان پایا جارہا ہے۔ اگرچہ ایک جانب ریاستی حکومت لوگوں کو تعمیر و ترقی کے خواب دکھا رہی ہے تو وہیں دوسری جانب لوگوں کے ان خوابوں کو شرمندہ تعبیر کرنے کے لئے برسوں لگ جاتے ہیں۔

داؤدپورہ کے لوگوں کا کہنا ہے کہ ان کے علاقہ میں محکمہ دیہی ترقی کی جانب سے اگرچہ مستحق لوگوں میں جاب کارڑ فراہم کئے گئے، تاہم آج کی تاریخ تک نہ تو مزدور پیشہ سے وابستہ افراد کو ان جاب کارڈس کا کوئی فائدہ پنہچا اور نہ ہی مذکورہ علاقہ میں کسی تعمیرات کا قیام عمل میں لایا گیا۔ علاقہ میں نہ تو کہیں لوگوں کی آمدورفت کے کئے رابطہ سڑکوں کا انتظام ہے اور نہ ہی علاقہ سے بہنے والے ندی نالوں پر کوئی باندھ تعمیر کیا گیا ہے۔ ان کا کہنا ہے کہ خراب موسمی میں ان کا گھروں سے نکلنا ناممکن بن جاتا ہے۔

مقامی لوگوں کا کہنا ہے کہ سیاسی اثر و رسوخ رکھنے والے افرد مستحق لوگوں کا حق چھینتے ہیں۔ ان کے مطابق اگرچہ علاقہ میں آمدنی کا کوئی ذریعہ نہیں ہے تاہم انہیں اُمید تھی کہ محکمہ دیہی ترقی کی جانب سے آمدانی کے وسائل فراہم کئے جائیں گے۔ لیکن کووڈ-19 کی وجہ سے مزدوری ملنا بھی بند ہو گیا ہے۔مقامی لوگوں نے محکمہ دیہی ترقی سے مطالبہ کیا ہے کہ ان کے علاقہ میں رابطہ سڑکوں اور علاقہ سے بہنے والے ندی نالوں پر تعمیراتی کام شروع کیا جائے تاکہ مقامی لوگوں کے لئے روزگار کے وسائل ہموار ہو جائیں۔ ای ٹی وی بھارت نے جب فون پر یہ معاملہ بلاک ڈیولپمینٹ آفیسر لارنو مظفر احمد کی نوٹس میں لایا تو انہوں نے کہا کہ کوئی بھی تعمیراتی کام شروع ہونے سے قبل انتظامیہ گرام پنچایت کی میٹنگ کا انعقاد کرتی ہے، جس کے بعد مختلف علاقوں کے جاب کارڑ ہولڈرس کو کام سونپا جاتا ہے۔ بی ڈی او نے نمائندہ کو یقین دلایا کہ علاقہ کے لوگ ان کے دفتر میں آجائیں تاکہ ان کے علاقہ میں تعمیراتی کام شروع کئے جائیں، اور جاب کارڑ ہولڈرس کو روزگار فراہم ہو۔