کوکرناگ میں رابطہ سڑک نہیں ہونے سے عوام پریشان

ماگرے پورہ گڈول میں 3 حاملہ خواتین کی موت کے باوجود رابطہ سڑک کا کام نامکمل ہے جس کی وجہ سے مقامی آبادی کو مشکلات کا سامنا کرنا پڑ رہا ہے۔

جموں و کشمیر انتظامیہ لوگوں کو سڑک، بجلی اور پانی جیسی سہولیات فراہم کرنے کا دعویٰ تو کرتا ہے لیکن وادی کے کچھ علاقے ایسے ہیں جہاں بنیادی سہولیات کا فقدان ہے۔ انہی علاقوں میں سے جنوبی ضلع اننت ناگ کے ماگرے پورہ گڈول کوکرناگ کا علاقہ بھی سرفرست ہے۔ مقامی لوگ رابطہ سڑک نہیں ہونے کی وجہ سے کئی برسوں سے پریشان ہیں۔

مقامی لوگوں کا کہنا ہے کہ 'ماگرے پورہ اور اس سے وابستہ کئی علاقوں کو تحصیل ہیڈ کوارٹر سے جوڑنے کے لیے سنہ 2016 میں پردھان منتری گرام سڑک یوجنا کی جانب سے رابطہ سڑک بنانے کا کام عمل میں لایا گیا تھا۔ تاہم پانچ سال کا طویل عرصہ گزر جانے کے باوجود بھی مذکورہ علاقوں کی رابطہ سڑک کا کام ابھی تک نامکمل ہے جس کی وجہ سے گنجان آبادی کو کئی مشکلات کا سامنا کرنا پڑ رہا ہے۔

لوگوں کے مطابق پی ایم جی ایس وائی نے مذکورہ سڑک کا ڈی پی آر چھ کلومیٹر کا بنایا تھا۔ تاہم پی ایم جی ایس وائی نے محض پانچ کلومیٹر میں کام کیا جو ابھی بھی نامکمل ہے جبکہ علاقہ میں قیام پذیر لوگوں کو ابھی تک معاوضہ بھی واگذار نہیں کیا گیا۔

ان کا کہنا ہے کہ 'جب بھی ان کے یہاں کوئی بیمار ہوتا ہے تو پختہ رابطہ سڑک نہ ہونے کے سبب انہیں بہت سی مشکلات کا سامنا کرنا پڑتا ہے۔'

مقامی لوگوں کے مطابق درد ذہ میں مبتلا تین خواتین کو پختہ سڑک نہ ہونے کی وجہ سے اپنی جانوں سے ہاتھ گنوانا پڑا۔

ان کا کہنا ہے کہ 'جب انہیں راشن یا دوسری اشیاء کے لیے بازار جانا ہوتا ہے تو انہیں عبور و مرور میں کافی دشواریوں کا سامنا کرنا پڑتا ہے۔'

مقامی لوگوں کا کہنا ہے کہ 'انہوں یہ معاملہ کئی بار انتظامیہ کی نوٹس میں لایا۔ تاہم آج تک ان کے مطالبہ پر غور نہیں کیا گیا۔'

ای ٹی وی بھارت نے جب یہ معاملہ کے پی ایم جی ایس وائی کے اسسٹنٹ ایگزیکیٹیو انجینیئر سید ہلال کی نوٹس میں لایا تو انہوں نے کہا کہ وادی میں نامساعد حالات کی وجہ سے مذکورہ سڑک کا کام دھیمی رفتار سے چل رہا تھا، جس کی وجہ رابطہ سڑک کو تعمیر کرنے میں دیر ہوگئی۔

ان کا کہنا تھا کہ 'انہوں نے سڑک کی تعمیر نو میں آنے والی زمین اور جائیداد کیسز کی فائلیں پہلے ہی ڈپارٹمنٹ کو بھیجی ہیں جوں ہی پیسے دستیاب ہوں گے تو لوگوں کو جلد ہی وہ پیسے واگذار کیے جایئں گے۔

سید ہلال نے نمائندہ کو یقین دلایا کہ چند روز کے اندر علاقہ کی رابطہ سڑک پر میکڈامائزیشن کا کام عمل میں لایا جائے گا جس سے کثیر آبادی کو چلنے پھرنے میں راحت ملے گی۔