ایک سیلفی نے طارق میر کی تقدیر بدل دی

جنوبی کشمیر کے ضلع اننت ناگ کے بُمتھن علاقہ سے تعلق رکھنے والے طارق میر بلند حوصلوں کی بدولت بالی ووڈ تک رسائی حاصل کرنے میں کامیاب ہو گئے۔

ای ٹی وی بھارت سے بات کرتے ہوئے طارق نے کہا کہ ان کی قسمت کا ستارہ اس وقت چمک گیا جب سنہ 2018 میں انہوں نے محکمہ سیاحت کی جانب سے سیاحتی مقام پہلگام میں ونٹر فیسٹول کے سلسلہ میں منعقدہ ایک پروگرام میں حصہ لیا تھا، جہاں اُن کی ملاقات بالی وُوڈ کے معروف ہدایتکار امتیاز علی سے ہوئی۔

طارق نے ان کے ساتھ ایک سیلفی لی جو بعد میں سوشل میڈیا پر کافی وائرل ہوئی۔ طارق کے تصور میں ہی نہیں تھا کہ ایک سیلفی سے ان کی تقدیر بدل سکتی ہے..

دراصل طارق کی شکل ہالی ووڈ چھوٹے پردے کے مشہور و معروف انگلش اداکار، پیٹر ڈکلیج، کے ساتھ ہو بہو ملتی جلتی ہے جس کی بنیاد پر انہیں معروف انگریزی سیریل، دی گیم آف تھرونس، میں کام کرنے کا آفر ملا۔ گیم آف تھرونس کے چند شاٹس عالمی شہرت یافتہ گلمرگ کی برفیلی پہاڑیوں میں فلمائے گئے جہاں طارق میر کو پیٹر ڈکلیج کے بدلے کردار ادا کرنے کا موقع فراہم ہوا۔ انگلش سیریل میں اداکاری کے جوہر دکھانے کے بعد طارق کو سُپر اسٹار سلمان خان کی سپر ہٹ فلم 'بھارت' میں کام کرنے کی پیشکش کی گئی۔

آخر کار طارق ممبئی چلے گئے اور انہوں نے بھارت فلم کے سُولو موشن، نغمہ میں اپنا کردار ادا کیا۔ سلو موشن نغمہ کی شروعات طارق کے ویلکم ٹو دی گریٹ رشین سرکس، ڈائیلاگ سے کی گئی ہے، اس نغمہ میں طارق کو سلمان خان اپنی گود میں اٹھا رہے ہیں اور طارق سلمان خان اور فلم کی ہیروئین دشا پٹانی کے ساتھ ڈانس کرتے نظر آرہے ہیں۔

سلمان خان کی سُپر ہٹ فلم میں کام کرنے کے بعد طارق کو آئی ٹی سی، کمپنی کی جانب سے ایک ایڈ (اشتہار) کی پیشکش کی گئی۔ بڑے پردے کے ساتھ ساتھ چھوٹے پردہ پر بھی اپنی جھلک دکھانے کے بعد طارق کی مقبولیت میں مزید اضافہ ہوا۔

حالانکہ طارق نے پہلے کئی دیگر کشمیری، مزاحیہ سیریلز میں کام کیا ہے۔ جس سے انہیں مقامی طور کافی شہرت بھی ملی۔ لیکن طارق کا کہنا ہے کہ چھوٹا قد ہونے کے سبب سماج میں ان کا مذاق اڑایا جا رہا تھا۔ تاہم بالی ووڈ میں قدم رکھنے کے بعد لوگ ان کی مثال دے رہے ہیں۔

بھارت فلم میں کام کرنے کے بعد طارق کو کامیابی کے آثار تب نظر آنے لگے جب سنہ 2019 میں انہیں بالی ووڈ سے اگلی ہندی فلم میں کام کرنے کی پیشکش کی گئی۔ تاہم نامساعد حالات نے طارق کے ارمانوں کا گھلا گھونٹ دیا اور اس کے مستقبل میں تاریکی کے بادل منڈلانے لگے..دراصل اُن دنوں حکومت کی جانب سے ریاست کا خصوصی درجہ ختم کیا گیا تھا اور پوری ریاست میں بدترین لاک ڈاون کا نفاظ عمل میں لایا گیا تھا.. وہیں انٹرنیٹ سمیت وائس کالنگ کو بھی مکمل طور معطل کیا گیا تھا، جس کے سبب لوگوں کا ایک دوسرے کے ساتھ رابطہ منقطع ہوگیا تھا۔

طارق کا کہنا ہے کہ 370 ہٹانے سے قبل انہیں اگلی فلم میں کام کرنے کے لیے اسکرپٹ بھی بھیج دیا گیا تھا وہ بہت خوش تھے اور وہ ممبئی جانے کی تیاری کر رہے تھے۔ تاہم ریاست میں پیدا شدہ صورتحال نے ان کی امیدوں پر پانی پھر دیا۔ طارق کے مطابق انہیں مرجاواں فلم میں،، ویلن کا رول کرنا تھا جو بعد میں رتش دیشمک نے نبھایا

ایک اچھا موقعہ گنوانے کے بعد طارق کو کافی افسوس ہوا ہے۔ وہ آج اپنے گاؤں میں کریانہ کی دکان چلا کر اپنا خرچہ نکال رہے ہیں.. تاہم ان کی امیدیں ابھی بھی ٹوٹی نہیں ہیں۔

طارق کہتے ہیں کہ وہ جلد ہی نہ صرف بالی ووڈ بلکہ ہالی ووڈ کے بڑے پردے پر بھی نظر آئیں گے۔

ان کا کہنا ہے کہ وہ ہالی ووڈ کے ہمشکل اداکار،، پیٹر ڈکلیج،، سے ملاقات کے خواہاں ہیں۔طارق اپنے بھائیوں خاص کر سلمان خان کا شکریہ ادا کرتے ہیں کہ انہوں نے اُن کی ہر ممکن مدد کی ہے۔

طارق کے والد محمد احسن میر کئی سال قبل فوت ہو چکے تاہم طارق کی والدہ کا کہنا ہے کہ وہ اپنے بیٹے کا قد کم ہونے کے سبب اُس کے مستقبل کو لے کر کافی پریشان رہتی تھی تاہم طارق کی فلمی دنیا میں قدم رکھنے کے بعد وہ مطمئن ہو گئی ہیں اور انہیں اپنے بیٹے پر فخر ہے ۔ اب وہ صرف طارق کی شادی کو لے کر تھوڑی فکر مند ہیں۔