ضلع اننت ناگ کے حیات پورہ ساگم کوکرناگ کے لوگوں نے شکایت کی ہے کہ گذشتہ ماہ پی ایم جی ایس وائی نے علاقہ کی سڑکوں پر تارکول بچھایا تھا، تاہم ابھی تک سڑک کے کناروں کو کسی ٹھوس چیز سے بند نہیں کیا گیا، جس کے سبب سڑک کنارے سے ٹوٹ رہی ہے اور علاقہ سے گزرنے والی گاڑیوں کو کئی دقتوں کا سامنا ہے۔
لوگوں کا کہنا ہے کہ جب علاقہ سے کوئی گاڑی چلتی ہے تو دوسری گاڑی 'یا' موٹر سائکل کا مذکورہ سڑک پر چلنا دشوار ہو جاتا ہے۔ کیونکہ رابطہ سڑک کی ڈھلان تارکول کے عمل سے کافی اونچی ہو گئی ہے۔ جبکہ سڑک کے کنارے نیچے چلے گئے۔ جہاں مٹی اور کیچڑ کی وجہ سے گاڑیاں اُس پر نہیں ٹک پاتیں۔ نتیجتاً علاقہ میں گذشتہ ماہ سے کئی بار حادثات بھی رونماء ہو چکے ہیں۔
مقامی لوگوں کا کہنا ہے کہ اگرچہ علاقہ میں سڑک کے کنارے پی ایم جی ایس وائی نے ڈرینیج نظام اور باندھ کی تعمیر نو کو یقینی بنایا تھا، تاہم چند روز گذر جانے کے بعد ہی علاقہ میں سڑک کے کنارے تعمیر شدہ ڈرین اور باندھ میں بڑی بڑی دراریں پیدا ہو گئیں ہیں۔
علاقہ کے لوگوں کا کہنا ہے کہ اُن کی ذرعی زمین تک جانے والی نہر کو گذشتہ مہینے میں ہی تعمیر کیا گیا تھا، لیکن محض کچھ عرصہ بیت جانے کے بعد مذکورہ نہر کے باندھ میں بڑے بڑے چھید ہو گئے، جہاں سے پانی نکل رہا ہے۔ ان کا کہنا ہے کہ اگر چہ خشک سالی کی وجہ سے نہر میں پانی کی سطح کم ہے، لیکن ساون کے موسم میں نہر کا کیا حال ہوگا، اس کا اندازہ لگانہ مشکل نہیں ہے۔