اننت ناگ میں دوبارہ کورونا کرفیو نافذ

ضلع اننت ناگ میں انتظامیہ نے جمعہ کو دوبارہ کورونا کرفیو نافذ کر دیا ہے جو پیر کی صبح تک رہے گا۔

عالمی وبا کورونا وائرس کی دوسری لہر کے پیش نظر اننت ناگ میں ضلع صدر مقام اور دیگر اہم قصبوں کو جانے والے راستوں کو پولیس نے سیل کر دیا ہے اور عام لوگوں کی نقل و حمل پر مکمل پابندی عائد کر دی گئی ہے۔ تاہم ایمرجنسی خدمات اس دوران جاری رہیں گی جبکہ کھانے پینے کی اشیاء، پھل، سبزیوں کی سپلائی کو یقینی بنانے کے لیے اقدامات اٹھائے گئے ہیں۔

انتظامیہ نے پیر کی صبح تک ضلع بھر میں لاک ڈائون کا اعلان کیا ہے۔

انتظامیہ نے اگرچہ تجارتی مراکز کو بند رکھنے کے احکامات صادر کیے ہیں تاہم کچھ مقامات پر اشیائے ضروریہ کی رسائی ممکن بنانے کے لیے ڈھیل دی گئی ہے۔

ڈی سی اننت ناگ نے لوگوں سے کرفیو کی سختی سے پاسداری ممکن بنانے کے لیے تعاون طلب کیا ہے۔