اننت ناگ: منشیات سمیت دو افراد گرفتار

منشیات مخالف مہم کو جاری رکھتے ہوئے اننت ناگ پولیس نے پیر کو کھنہ بل چوک اور مٹن سے منشیات فروشی کے الزام میں مزید دو افراد کو گرفتار کر لیا ہے اور ان کے قبضہ سے منشیات بر آمد کرنے کا دعویٰ کیا ہے۔

پولیس اسٹیشن اننت ناگ کی ایک ٹیم نے کھنہ بل چوک میں قائم ناکہ پر تلاشی کارروائی کے دوران ایک شخص کی تحویل سے کوڈین فاسفیٹ کی 20 بوتلیں برآمد کی۔

مذکورہ شخص کی شناخت نندہ پورہ کھنہ بل کے رہنے والے اشفاق مجید نندہ ولد مرحوم عبدالمجید نندہ کے طور پر ہوئی ہے۔ ملزم کو گرفتار کرکے اس کے خلاف این ڈی پی ایس ایکٹ کے تحت ایک مقدمہ درج کیا گیا ہے۔

وہیں مٹن پولیس اسٹیشن سے وابستہ پولیس کی ایک پارٹی نے اور ایک ناکہ کے دوران کُھل ژھر، ڈیٹھو علاقہ سے تعلق رکھنے والے بلال احمد وانی ولد غلام رسول وانی نامی ایک شخص کی تحویل سے تقریبا 350 گرام چرس برآمد کرکے اسے سلاخوں کے پیچھے دھکیل دیا۔

اسکے خلاف بھی اننت ناگ پولیس نے متعلقہ دفعہ کے تحت کیس درج کر لیا۔

اس سے قبل جموں و کشمیر پولیس کی جانب سے ضلع اننت ناگ میں سرینگر - جموں قومی شاہراہ پر قائم کیے گئے ایک ناکے پر تلاشی کارروائی کے دوران دو افراد کی تحویل سے قریب 57کلو گرام وزنی Poppy Strawکو ضبط کرکے ملزمان کو حراست میں لے لیا گیا تھا۔

اننت ناگ پولیس نے ایک بار پھر عوام سے اپیل کرتے ہوئے کہا کہ وہ منشیات مخالف مہم میں پولیس کا ساتھ دیں تاکہ معاشرے کو منشیات کی لعنت سے پاک و صاف کیا جا سکے۔