نیویارک کے گورنر اینڈریو کومو نے یہ اطلاع دی کہ یو ایس اوپن ٹورنامنٹ اپنے طے شدہ شیڈول کے مطابق ہوگا تا ہم اس دوران اسٹیڈیم میں شائقین نہیں ہوں گے۔
انہوں نے کہا کہ ٹورنامنٹ اپنے مقررہ پروگرام کے مطابق ہوگا لیکن کورونا وائرس کے خطرے کے پیش نظر اسٹیڈیم میں شائقین کی موجودگی نہیں ہوگی، اس کے ساتھ ہی انہوں نے کہا کہ کھلاڑیوں اور اسٹاف کی حفاظت کے لیے ضروری احتیاطی اقدامات کئے جائیں گے۔
واضح رہے کہ یوایس اوپن 31 اگست سے 13 ستمبر تک کھیلا جائے گا۔ جبکہ پوری دنیا میں مارچ مہینے سے ٹینس سمیت تمام کھیلوں کی سرگرمیاں متاثر ہوئی ہیں حالانکہ حال ہی میں بلغراد میں چیریٹی ٹینس ٹورنامنٹ کا انعقاد کیا گیا ہے جسے دنیا کے نمبر ایک کھلاڑی سربیا کے نوواک جوکووچ نے منعقد کیا تھا۔
مئی میں ہونے والا سال کا دوسرا گرینڈ سلیم فرینچ اوپن ستمبر تک کے لیے ملتوی کردیا گیا ہے جبکہ تیسرا گرینڈ سلیم ومبلڈن دوسری عالمی جنگ کے بعد پہلی مرتبہ منسوخ کیا گیا ہے۔