فیڈرر کی ومبلڈن میں 99 ویں جیت اور 17 واں کوارٹر فائنل

گراس کورٹ کے بے تاج بادشاہ سوئٹزرلینڈ کے راجر فیڈرر نے سال کی تیسری گرینڈ سلیم ومبلڈن ٹینس چیمپئن شپ میں اپنی شاندار کارکردگی برقرار رکھی۔

انھوں نے پیر کے روز اٹلی کے ماتيو بینی ٹني کو مسلسل سیٹوں میں 6۔1، 6۔2، 6۔2 سے شکست دے کر کوارٹر فائنل میں جگہ بنا لی۔

دوسری سیڈ یافتہ آٹھ بار کے چیمپئن فیڈرر نے 17 ویں سیڈ بینی ٹني سے مقابلہ صرف ایک گھنٹے 14 منٹ میں جیت لیا۔

فیڈرر کی ومبلڈن میں یہ 99 ویں جیت ہے اور وہ 17ویں بار ومبلڈن کے کوارٹر فائنل میں پہنچے ہیں۔ فیڈرر اب آل انگلینڈ کلب پر اپنی 100 ویں فتح حاصل کرنے سے ایک جیت دور رہ گئے ہیں۔

فیڈرر اور بینی ٹني کے درمیان یہ پہلا مقابلہ تھا اور اطالوی کھلاڑی کے پاس سوئس ماسٹر کے ماسٹر کلاس کا کوئی جواب نہیں تھا۔ اس جیت کے ساتھ فیڈرر کا اس سیشن میں 36۔4 کا ریکارڈ ہو گیا ہے۔