فرینچ اوپن کے بادشاہ مانے جانے والے رافیل نڈال نے اتوار کے روز مینز سنگلز کے فائنل میں سربیا کے نوواک جوکووچ کو شکست دے کر اپنا 13 واں فرینچ اوپن ٹائٹل اپنے نام کر لیا۔
نڈال نے جوکووچ کو 0-6، 2-6، 5-7 سے شکست دے کر مجموعی طور پر 20 واں گرینڈ سلیم ٹائٹل جیت لیا۔ یہ رولاں گیراں پر رافیل نڈال کی 100 ویں جیت ہے۔
انہوں نے جیت کے لحاظ سے روجر فیڈرر کی برابری کر لی ہے۔ دونوں کے پاس 20۔20 گرینڈ سلیم ٹائٹل ہیں۔ وہیں جوکووچ کو اس سال پہلی شکست ملی۔
اس سے پہلے یو ایس اوپن سے جوکووچ کو باہر کردیا گیا تھا، کیوں کہ انہوں نے لائن جج کو گیند مار دی تھی۔ وہ اپنا 18 واں گرینڈ سلیم ٹائٹل جیتنے سے محروم رہ گئے۔
دراصل نڈال اور جوکووچ کا سامنا فرینچ اوپن میں 8 ویں بار ہوا تھا اور نڈال نے 7 ویں مرتبہ کامیابی حاصل کی۔ مجموعی طور پر گرینڈ سلیم دونوں کے درمیان 16 واں میچ تھا اور نڈال نے 10 ویں بار کامیابی حاصل کی ہے۔
یہ بھی پڑھیں: 'کم رنز کی وجہ سے ہار کا سامنا کرنا پڑا'
واضح رہے کہ نوواک جوکووچ نے پانچ سیٹوں والی میراتھن کے سیمی فائنل میں اسٹیفانوس سیسیپاس کو شکست دے کر فرینچ اوپن کے فائنل میں جگہ بنائی تھی۔
