سوئٹزرلینڈ کے ٹینس اسٹار راجر فیڈرر نے دبئی چمپئن شپ کے سیمی فائنل میں کروشیا سے تعلق رکھنے والے نوجوان کھلاڑی بورنا کورک کو شکست دیکر فائنل میں جگہ بنالی ہے اور انفرادی طور پر وہ خطاب کی سنچری بنانے سے ایک میچ دور رہ گئے ہیں۔
ٹینس کی تاریخ میں 20 گرینڈ سلیم حاصل کرنے والے 37 سالہ راجر فیڈرر کا دبئی چمپئن شپ کے فائنل میں ابھرتے ہوئے یونانی اسٹار اسٹیفینوس سے مقابلہ ہوگا جہاں کامیابی کی صورت میں وہ تاریخ رقم کریں گے۔راجر فیڈرر نے سیمی فائنل میں بورنا کورک کو67 منٹ کے مقابلے میں باآسانی 6-2 ،6-2 سے شکست دے دی۔میچ میں کامیابی کے بعد راجر فیڈرر نے کہاکہ 'میرے خیال میں میچ کے دوران انہیں زیادہ مواقع نہ دینا اور انہیں شکست کا احساس دلانا اہم تھا اور آخر میں اچھا کھیلنے پر میں خوش ہوں'۔فیڈرر سے قبل امریکا کے سابق کھلاڑی جمی کونرز نے 109 خطاب جیت کر یہ اعزاز حاصل کیا تھا جو تاحال پہلے نمبر پر ہیں۔راجر فیڈرر کو دبئی چمپئن کے فائنل میں خطاب کا مضبوط دعویدار قرار دیا جارہا ہے اس لیے خطاب کی سنچری مکمل کرنے کے امکانات بھی روشن ہیں۔دونوں کھلاڑی جنوری 2019 میں آسٹریلین اوپن میں بھی مدمقابل آئے تھے تاہم یہاں پر اسٹیفنوس نے حیران کن طور پر کامیابی حاصل کرکے سیمی فائنل میں جگہ بنائی تھی۔راجر فیڈرر نے 100 خطاب پر بات کرتے ہوئے کہا 'کہ اسٹیفنوس نے آسٹریلین اوپن میں میرا مقابلہ کیا تھا اور وہ ایک مشکل کھلاڑی ہیں اور لگتا ہے کہ تاحال 100 خطاب تک پہنچنے کے لیے کافی دور ہیں تاہم کوشش کروں گاکہ بھرپور توجہ سے اچھا کھیلوں'۔وہی اسٹیفینوس کا کہنا ہے ' میرے کھیل میں گزشتہ برس کے مقابلے میں بہتری آئی ہے، سرفہرست 10 کھلاڑیوں میں شامل بڑے کھلاڑیوں اور بڑے ناموں کو شکست دینا بڑی بات ہے اور کسی موقع پر میں بھی ٹاپ 10 میں جگہ بنانا چاہتا ہوں'۔
