PM Modi on Asian Games 2023 وزیراعظم نے گذشتہ ساٹھ برسوں میں ایشیائی کھیلوں میں بھارت کی بہترین کارکردگی کی ستائش کی

وزیراعظم نریندر مودی نے ایشین گیمز 2023 میں بھارتی کھلاڑیوں کی شاندار کارکردگی کے لیے انھیں مبارکباد پیش کی ہے۔

نئی دہلی: وزیر اعظم نریندر مودی نے اتوار کو ایشیائی کھیل 2023 میں گزشتہ 60 سالوں میں 107 تمغوں کے ساتھ ہندوستان کی اب تک کی بہترین کارکردگی، کھلاڑیوں کے اٹل عزم، انتھک جذبے اور محنت کی تعریف کی۔ وزیر اعظم نے آج سوشل میڈیا پلیٹ فارم ایکس پر پوسٹ کیاکہ "ایشیائی کھیلوں میں ہندوستان کے لئے ایک بہت بڑی اور تاریخی کامیابی! پوری قوم اس بات پر بے حد خوش ہے کہ ہمارے غیر معمولی کھلاڑیوں نے اب تک کے سب سے زیادہ 107 تمغے جیتے ہیں جو کہ گزشتہ 60 سالوں میں بہترین کارکردگی ہے۔‘‘

ہمارے کھلاڑیوں کے غیر متزلزل عزم، انتھک جوش اور محنت نے ملک کا سر فخر سے بلند کیا ہے۔ "ان کی جیت نے ہمیں یادگار لمحات فراہم کیے ہیں، ہم سب کو متاثر کیا ہے اور بہترین کارکردگی کے لیے ہمارے عزم کا اعادہ کیا ہے۔" واضح رہے کہ ہندوستان نے 19ویں ایشیائی کھیلوں میں 28 سونے، 38 چاندی اور 41 کانسے سمیت کل 107 تمغے جیتے ہیں، جو ان کھیلوں میں ہندوستان کی اب تک کی بہترین کارکردگی ہے۔ واضح رہے کہ گذشتہ کل سات اکتوبر کو بھارتی کھلاڑیوں نے چین میں جاری ایشین گیمز 2023 میں 100 میڈلز کا سنگ میل عبور کیا تھا۔ اس سے قبل 2018 میں بھارت نے 70 میڈل جیتے تھے۔

یو این آئی