ایک سال بعد میری کام کی رِنگ میں واپسی

چھ بار عالمی چیمپیئن اور اولمپک میڈل یافتہ ایم سی میری کام ایک برس بعد رِنگ میں اترنے کے لیے تیار ہے۔

میری کام سمیت 14 بھارتی مکے باز یکم مارچ سے 7 مارچ تک ہونے والے باکسم انٹرنیشنل باکسنگ ٹورنامنٹ میں حصہ لینے کے لیے اسپین روانہ ہوئی ہیں۔

مایہ ناز مکے باز ایم سی میری کام (51 کلو گرام) اور کامن ویلتھ گیمز میں سِلور میڈل فاتح منیش کوشک (63 کلو گرام) گزشتہ برس مارچ میں ایشیائی اولمپک کوالیفائر میں حصہ لینے کے بعد پہلی بار رِنگ میں اترنے جا رہے ہیں۔

اس ٹورنامنٹ میں 19 سینیئر مکے باز اور اولمپک کوٹہ حاصل کرنے والے مکے باز حصہ لیں گے۔ بھارتی ٹیم میں 8 مرد اور 6 خواتین مکے باز شامل ہیں۔ ان میں سے 9 نے اولمپک کوٹہ حاصل کر لیا ہے۔ نوجوان مکے باز جاسمن بھی بھارتی ٹیم میں شامل ہیں اور 57 کلوگرام زمرے میں حصہ لیں گی۔ یہ ان کا پہلا سینیئر ٹور ہے۔