گنیشورن یو ایس اوپن کے اصل ڈرا سے چوکے

بھارت کے دوسرے نمبر کے سنگلز کھلاڑی پرجنیش گنیشورن طویل سفر پر امریکا پہنچے لیکن سال کے آخری گرینڈ سلیم یو ایس اوپن کے مرکزی ڈرا میں ایک مقام سے محروم ہوگئے۔ اس کے باوجود گنیشورن کے یو ایس اوپن میں کھیلے جانے کی امید باقی ہے۔

ٹورنامنٹ کے منتظمین نے فیصلہ کیا ہے کہ وہ اس سال کورونا کے پیش نظر کوالیفائر نہ لینے کا فیصلہ کریں تاکہ بائیو سیکیور ماحول میں ہونے والے اس ٹورنامنٹ میں لوگوں کی تعداد کم ہوسکے۔ مرکزی ڈرا کی ابتدائی فہرست میں جگہ بنانے والے سمت ناگل ہندوستان کے آخری کھلاڑی تھے۔

کورونا کی وجہ سے متعدد کھلاڑیوں نے ابھی یہ فیصلہ کرنا باقی ہے کہ وہ امریکہ کا سفر کریں گے یا نہیں جس سے گنیشورن کو امید ہے کہ انہیں موقع مل سکے گا۔ گنیشورن عالمی درجہ بندی میں 132 نمبر پر ہیں اور وہ ناگل سے پانچ مقام پیچھے ہیں۔

گنیشورن گذشتہ سال آسٹریلیائی اوپن کے مرکزی ڈرا میں کھیلے تھے لیکن پہلے راؤنڈ میں ہار گئے تھے۔ اس کے بعد وہ ہر گرینڈ سلیم میں کھیل چکے ہیں ۔ وہ جمعرات کو قرعہ اندازی کی آخری رات نیو یارک پہنچے تھے لیکن متبادل کھلاڑیوں کی فہرست میں مصر کے محمد صفوت کو ان سے پہلے رکھا گیا ہے۔