جمیکا:نیوزی لینڈ نے گلین فلپس (76) اور ڈیرل مچل (48) کی شاندار اننگز کی بدولت ویسٹ انڈیز کو دوسرے ٹی 20 میں 90 رنز سے شکست دے کر سیریز میں 2-0 کی ناقابل تسخیر برتری حاصل کر لی۔
ہفتہ کو کھیلے گئے میچ میں بلیک کیپس نے ویسٹ انڈیز کو جیت کے لیے 216 رنز کا ہدف دیا جس کے جواب میں ویسٹ انڈیز کی ٹیم 20 اوورز میں صرف 125 رنز ہی بنا سکی۔
ٹاس جیت کر پہلے بیٹنگ کرتے ہوئے نیوزی لینڈ کو مارٹن گپٹل اور ڈیون کونوے نے عمدہ آغاز فراہم کیا۔ گپٹل نے 11 گیندوں پر تین چوکوں کی مدد سے 20 جبکہ کونوے نے 34 گیندوں پر دو چوکوں اور تین چھکوں کی مدد سے 42 رنز بنائے۔ کپتان کین ولیمسن (4) کے جلد آؤٹ ہونے کے بعد فلپس اور مچل نے برتری حاصل کی اور کیریبین گیند بازوں کو ناکوں چنے چبوائے۔ دونوں کے درمیان 34 گیندوں میں 83 رنز کی پارٹنرشپ ہوئی۔
فلپس نے 41 گیندوں میں چار چوکوں اور چھ چھکوں کی مدد سے 76 رنز بنائے جبکہ مچل نے 20 گیندوں میں دو چوکوں اور چار چھکوں کی مدد سے 48 رنز بنائے۔ ونڈیز کی جانب سے اوبید میک کوئے نے چار اوورز میں 40 رنز دے کر تین وکٹیں حاصل کیں۔