ICC world cup 2023 پی سی بی نے پاکستانی شائقین کو ویزے نہ دینے پر آئی سی سی سے احتجاج درج کرایا

پاکستان کرکٹ بورڈ (پی سی بی) نے پاکستانی صحافیوں کے ویزوں میں تاخیر اور پاکستانی شائقین کے لیے ویزا نہ دینے پر آئی سی سی سے احتجاج درج کرایا ہے۔ اس کے علاوہ پی سی بی نے احمد آباد کے نریندر مودی اسٹیڈیم میں بھارت کے خلاف میچ کے دوران پاکستانی ٹیم کو نشانہ بنانے والے نامناسب رویے کے حوالے سے بھی آئی سی سی کو شکایت درج کرائی ہے۔

حیدر آباد: پاکستان کرکٹ بورڈ (پی سی بی) نے منگل کو انٹرنیشنل کرکٹ کونسل (آئی سی سی) سے بھارت میں جاری کرکٹ ورلڈ کپ کی کوریج کے لیے پاکستانی صحافیوں کے ویزوں میں تاخیر پر باضابطہ احتجاج درج کرایا ہے۔ اس کے علاوہ پی سی بی نے اپنے مداحوں کو ویزا نہ دینے کی بھارتی پالیسی پر بھی احتجاج درج کرایا ہے۔ واضح رہے کہ 14 اکتوبر کو احمد آباد کے نریندر مودی اسٹیڈیم میں بھارت کے خلاف میچ میں صرف ایک یا دو پاکستانی شائقین موجود تھے۔

سوشل میڈیا پلیٹ فارم ایکس پر شیئر کی گئی ایک پوسٹ میں پی سی بی نے لکھا کہ پاکستان کرکٹ بورڈ (پی سی بی) نے پاکستانی صحافیوں کے ویزوں میں تاخیر اور پاکستانی شائقین کے لیے ویزا پالیسی کی عدم موجودگی پر آئی سی سی سے ایک اور رسمی احتجاج درج کرایا ہے۔ اس کے علاوہ پی سی بی نے احمد آباد کے نریندر مودی اسٹیڈیم میں ہندوستان کے خلاف میچ کے دوران پاکستانی اسکواڈ کو نشانہ بنانے والے بھارتی شائقین کے نامناسب رویے کے حوالے سے بھی آئی سی سی کو شکایت درج کرائی ہے۔

ذرائع کے مطابق نریندر مودی اسٹیڈیم میں بھارت کے خلاف میچ کے دوران شائقین کے ایک گروپ نے پاکستانی ٹیم کو نامناسب الفاظ سے پکار رہے تھے اور جب محمد رضوان آوٹ ہوکر پویلین لوٹ رہے تھے تو انھیں دیکھ کر جے شری رام کے نعرے لگائے گئے۔ موٹیرا میں بھارت کے خلاف میچ کو پی سی بی کے سربراہ ذکا اشرف نے بھی دیکھا۔ پاکستانی ٹیم نے اپنی ورلڈ کپ مہم کا آغاز حیدرآباد سے کیا تھا پھر وہ احمد آباد چلی گئی اور اب کرناٹک کے دارالحکومت بنگلورو میں ہے۔ انہوں نے اب تک دو میچ جیتے ہیں اور ایک میں شکست ہوئی ہے اور پاکستان کا اگلا میچ پانچ بار کے چیمپئن آسٹریلیا سے جمعہ 20 اکتوبر کو بنگلورو میں ہے۔