چینئی سُپر کنگز کو 168 رنز کا ہدف

چنئی سُپر کنگز کے خلاف آئی پی ایل کے 21 ویں میچ میں کولکاتا نائٹ رائیڈرز مقررہ 20 اوورز میں 167 رنز آل آؤٹ ہوگئی۔

ٹاس جیت کر پہلے بلے بازی کرنے اتری کولکاتا نائٹ رائیڈرز کی جانب سے راہل تریپاٹھی اور شبھمن گل نے اننگ کی شروعات کی اور پہلے وکٹ کے لیے 37 رنز بنائے۔ 37 رنز کے مجموعی اسکور پر شبھمن گل 11 رنز بنا کر آؤٹ ہوگئے۔

اس کے بعد نتیش رانا بھی 9 رنز بنا کر کرن شرما کا شکار بنے جبکہ گزشتہ میچ میں شاندار بلے بازی کرنے والے ایون مورگن اس میچ میں کچھ خاص کمال نہیں دکھا سکے اور 10 گیندوں میں محض 7 رنز بنا کر آؤٹ ہوئے انہیں سیم کُرین نے دھونی کے ہاتھوں کیچ کروایا۔

اس کے علاوہ سنیل نارائن(17 رنز)، آندرے رسل(2 رنز) اور دنیش کارتک 12 رنز بنا کر پویلین لوٹ گئے۔ دوسری جانب سے راہل تریپاٹھی اکیلے مزاحمت کرتے رہے اور 51 گیندوں میں 81 رنز کی شاندار اننگ کھیلی اس دوران انہوں نے 8 چوکے اور 3 چھکے لگائے۔ جبکہ کوئی بھی بلے باز ان کا ساتھ نہیں دے سکا۔

چنئی سُپر کنز کی جانب سے ڈوین براوو سب سے کامیاب گیند باز رہے اور 3 بلے بازوں کو پویلین کی راہ دکھائی جبکہ کرن شرما، شاردل ٹھاکر اور سیم کُرین نے دو دو وکٹیں حاصل کیں۔