وراٹ کا چیلنج توڑ کر ممبئی پلے آف میں

شاندار فارم میں چل رہے سوریہ کمار یادو کی ناٹ آؤٹ 79 رنوں کی شاندار پاری کی بدولت ممبئی انڈینس، رائل چیلنجرس بنگلور کو بدھ کے روز یکطرفہ انداز میں پانچ وکٹ سے شکست دے کر آئی پی ایل۔13 کے پلے آف میں داخل ہو گئی ہے۔

بنگلور نے سلامی بلے باز دیودت پڈیکل کی 74 رن کی شاندار نصف سنچری کی پاری سے 20 اوورز میں چھ وکٹ پر 164 رن کا چیلنج بھرا اسکور بنایا لیکن سوریہ کمار یادو نے محض اپنے دم پر ممبئی کو فتح سے ہمکنار کرا دیا۔

ممبئی نے 19.1 اوور میں پانچ وکٹ کھو کر 166 رن بنا کر جیت درج کی۔ سوریہ نے 43 گیندوں پر نابعد 79 رن کی فاتحانہ پاری میں 10 چوکے اور تین چھکے لگائے۔ ممبئی کی 12میچوں میں یہ آٹھویں جیت ہے اور وہ 16 پوائنٹس کے ساتھ پلے آف میں پہنچنے والی پہلی ٹیم بن گئی ہے۔

دوسری جانب بنگلور کو 12 میچوں میں پانچویں شکست کا سامنا کرنا پڑا۔ بنگلور کے کھاتے میں 14 پوائنٹس ہیں اور پلے آف میں پہنچنے کے لیے اسے اپنے باقی دو میچوں میں سے ایک میں جیت حاصل کرنے کی ضرورت ہے۔ بنگلور آئی پی ایل ٹیبل پوائنٹس میں ممبئی کے بعد دوسرے مقام پر ہے۔