نئی دہلی:قومی دارالحکومت نئی دہلی میں بھارتی کرکٹ ٹیم کے چیف سلیکٹر اجیت اگرکر اور کپتان روہت شرما نے پریس کانفرنس کو خطاب کرتے ہوئے ایشیا کپ کے لئے قومی کرکٹ ٹیم کا اعلان کیا۔ اعلان کردہ ٹیم میں کے ایل راہل اور شریس ائیر کی واپسی ہوئی ہے جبکہ نوجوان بلے باز تلک ورما کو بھی موقع دیا گیا ہے۔
بھارتی کرکٹ ٹیم کے چیف سلیکٹر اجیت اگرکر نے نامہ نگاروں کے سوالوں کا جواب دیتے ہوئے کہاکہ ایشیا کپ کے لئے مضبوط اور متوازن ٹیم بنانے کی کوشش کی گئی ہے۔ ہم نے ایسی ٹیم کا اعلان کیا جس میں نوجوان اور تجربہ کار کھلاڑیوں کو جگہ دی گئی ہے۔
انہوں نے کہاکہ ایشیا کپ کے فورا بعد ہی کرکٹ عالمی کپ ہونا ہے اس کے مدنظر کھلاڑیوں کا انتخاب کیا گیا ہے۔ وکٹ کیپر بلے باز کے ایل راہل اور شریس ائیر دونوں فٹ ہو چکے ہیں۔ ان دونوں کو قومی کرکٹ ٹیم میں شامل کیا گیا ہے۔ دونوں کھلاڑیوں کے لئے ایشیا کپ کے میچز کافی اہم ہوں گے۔