تیز گیند باز اُمیش یادو دوسرے ٹیسٹ میچ کے دوران پنڈلی میں کی چوٹ کی وجہ سے آسٹریلیا کے خلاف آئندہ دو ٹیسٹ میچ سے باہر ہوگئے اور بائیں ہاتھ کے تیز گیندباز ٹی نٹراجن کو سڈنی میں 7 جنوری سے تیسرے ٹیسٹ میچ کے لیے یادو کی جگہ ٹیم میں شامل کیا گیا ہے۔
اُمیش یادو میلبورن میں دوسرے ٹیسٹ کی دوسری اننگز کے دوران پچ کے بیچ میں گر گئے تھے اور پنڈلی میں سنگین چوٹ کے سبب انہیں اس دورے سے باہر ہونا پڑا۔
واضح رہے کہ اس سے قبل تیز گیند باز محمد سمیع بھی زخمی ہونے کی وجہ سے پہلے ہی دورے سے باہر ہوچکے ہیں۔ محمد سمیع پہلے ٹیسٹ کے بعد باہر ہوئے تھے اور دوسرے ٹیسٹ میں ان کی جگہ تیز گیندباز محمد سراج نے ٹیسٹ کریئر کا آغاز کیا۔
اُمیش یادو کے باہر ہونے سے اب بھارت کو اپنے دو اہم تیز گیندبازوں کے بغیر ہی سڈنی میں تیسرے ٹیسٹ میں میدان پر اترنا ہوگا جبکہ ایشانت شرما سیریز شروع ہونے سے پہلے ہی دورے سے باہر ہوگئے تھے۔
بھارتی کرکٹ ٹیم کے پاس اس وقت تجربہ کار تیز گیند باز کی شکل میں صرف جسپریت بمراہ ہی موجود ہیں۔ ٹیم میں نودیپ سینی اور شاردُل ٹھاکر بھی موجود ہیں لیکن انہیں بین الاقوامی کرکٹ کا زیادہ تجربہ نہیں ہے جبکہ ٹی نٹراجن 'نیٹ بالر' کے طور پر ٹیم کا حصہ تھے۔
