ICC World Cup 2023 روہت شرما ایک مثالی کپتان ہیں، بھارت کو شکست دینا اب مشکل ہوگا: رکی پونٹنگ

آسٹریلیائی ٹیم کے سابق کپتان رکی پونٹنگ نے روہت شرما کو مثالی کپتان قرار دیتے ہوئے کہا کہ بھارت ایک باصلاحیت ٹیم ہے جس نے کرکٹ کے تمام شعبوں کا احاطہ کیا ہوا ہے اس وجہ سے ٹیم انڈیا اب ناقابل شکست ٹیم بن چکی ہے۔ بھارت جاری آئی سی سی کرکٹ ورلڈ کپ میں اب تک ناقابل شکست رہی ہے۔

حیدرآباد: بھارت آئی سی سی ورلڈ کپ 2023 میں اب تک ناقابل شکست ہے۔ روہت شرما کی زیرقیادت ٹیم نے چنئی میں پانچ بار کے چیمپئن آسٹریلیا کو شکست دے کر اپنی مہم کا آغاز کیا، پھر نئی دہلی میں افغانستان کو تو احمد آباد میں روایتی حریف پاکستان کو شکست دی۔ مسلسل تین جیت کے ساتھ بھارت پوائنٹس ٹیبل پر اس وقت +1.821 رن ریٹ کے ساتھ 6 پوائنٹس لے کر سرفہرست ہے۔ کپتان روہت شرما نے بلے باز کے طور پر ان میں سے دو جیت میں اہم کردار ادا کیا۔ روہت نے نئی دہلی کے کوٹلہ میں افغانستان کے خلاف 131 رنز بنائے تو احمد آباد کے نریندر مودی اسٹیڈیم میں پاکستان کے خلاف 86 رنز کی شاندار اننگز کھیلی۔

لیجنڈری آسٹریلوی کپتان رکی پونٹنگ نے روہت شرما کی کپتانی کی تعریف کرتے ہوئے کہا کہ بھارت کو پوائنٹس ٹیبل میں سب سے اوپر رکھنے میں روہت نے اہم کردار ادا کیا ہے۔ پونٹنگ نے اپنے خیالات کا اشتراک کرتے ہوئے بین الاقوامی کرکٹ کونسل کو بتایا کہ روہت شرما بہت پرسکون طبیعت کے ہیں، آپ اسے ان کے کھیلنے کے انداز میں بھی دیکھ سکتے ہیں۔ وہ ایک بالکل مختلف قسم کے بلے باز بھی ہیں اور وہ میدان کے اندر اور باہر ایسے ہی ہیں۔ ہم پیچھے بیٹھ کر یہ نہیں کہہ سکتے کہ روہت پر دباؤ کسی سطح پر حاوی نہیں ہوگا، یا ان پر اس کا کوئی اثر نہیں پڑے گا۔ کیونکہ بڑے ٹورنامنٹس میں دباؤ کا ہونا فطری بات ہے لیکن وہ اس سے بھی گزرے گا اور شاید اس کا سامنا بھی کرے گا۔

پونٹنگ کے 13,704 ون ڈے رنز حیران کن ہیں اس کے علاوہ وہ (1999، 2003، اور 2007) کے ورلڈ کپ جیتنے والی آسٹریلوی ٹیم کا حصہ بھی تھے، نے کہا کہ روہت شرما نے مین ان بلیو کے لیے بہت اچھا کام کیا ہے۔ روہت نے دسمبر 2021 سے ون ڈے میں بھارت کی کپتانی سنبھالی ہے۔ پونٹنگ کا ماننا ہے کہ روہت شرما اس وقت مثالی کپتان ہیں۔ بھارت اپنے گھر کی سرزمین پر بہت سارے میچز کھیلتا ہے جس کی وجہ سے انھیں اپنے پلان پر کام کرنے میں مدد ملتی ہے۔

ویراٹ کے بارے میں بات کرتے ہوئے پونٹنگ نے کہا کہ ویراٹ زیادہ دل سے کام کرتا ہے اور شائقین کی بات سنتا ہے اور مداحوں سے کچھ زیادہ ہی جڑا رہتا ہے۔ وہ ایک لاجواب آدمی ہے اور طویل عرصے سے ایک بہترین کھلاڑی رہا ہے اور اس نے بھارت کے کپتان کے طور پر بہت اچھا کام کیا ہے۔ پونٹنگ نے مزید کہا کہ بھارت ایک باصلاحیت ٹیم ہے اور میں نے شروع سے کہا تھا کہ مجھے لگتا ہے کہ وہ ہرانے والی ٹیم بننے جا رہے ہیں۔ انہوں نے اپنی تیز گیند بازی، اسپن، اور ٹاپ آرڈر، مڈل آرڈر بیٹنگ کے ساتھ تمام شعبوں کا احاطہ کیا ہے اس لیے بھارت کو ہرانا بہت مشکل ہوگا۔ لیکن ہم دیکھیں گے کہ وہ کس طرح انتہائی دباؤ والے میچ میں بھی خود کو پرسکون رکھتے ہیں۔ بھارت کا اگلا مقابلہ شکیب الحسن کی قیادت والی بنگلہ دیش سے جمعرات 19 اکتوبر کو پونے کے مہاراشٹر کرکٹ ایسوسی ایشن اسٹیڈیم میں ہوگا۔