World Cup 2023 عالمی کرکٹ بھارتی باؤلنگ اٹیک کی طاقت سے حیران

ورلڈ کپ 2023 میں بھارتی گیندبازوں کی شاندار کارکردگی کی ہر کوئی تعریف کر رہا ہے۔ عالمی کرکٹ کی تمام ٹیمیں بھارتی باؤلنگ اٹیک کی طاقت کو دیکھ کر حیران ہیں۔ انگلینڈ کے سابق کپتان مائیکل وان نے بھارتی گیند بازوں کی کارکردگی کو سراہتے ہوئے کہا مخالف ٹیمیں کس کس سے بچیں گی۔ Michael Vaughan on Indian bowlers

نئی دہلی: آئی سی سی ورلڈ کپ 2023 میں بھارتی ٹیم کی شاندار کارکردگی سے ہر کوئی حیران ہے۔ بھارتی ٹیم نے میچ کے ہر شعبے بیٹنگ، فیلڈنگ اور بولنگ، میں شاندار کارکردگی کا مظاہرہ کیا ہے۔ ٹیم انڈیا نے ورلڈ کپ 2023 میں اپنے لیگ کے 8 میچ جیت کر ابھی تک ناقابل شکست ہے۔ جس کی سب سے بڑی وجہ ان کی گیندبازی کی طاقت کو بتایا جارہا ہے۔ کیونکہ بھارت کی بلے بازی تو ہمشہ سے بہترین رہی ہے لیکن اس ورلڈ کپ میں بھارت کی گیندبازی نے بلے بازی سے زیادہ جلوہ بکھیرا ہے۔

انگلینڈ کے سابق کپتان مائیکل وان نے بھارتی گیند بازوں کی خوب تعریف کی ہے۔ سوشکل میڈیا پلیٹ فارم ایکس پر پوسٹ کرتے ہوئے انہوں نے لکھا کہ اگر بمراہ آپ کو آؤٹ نہیں کر پا رہے ہیں تو محمد سراج آپ کو آؤٹ کر دیں گے اور اگر آپ سراج سے بھی آؤٹ نہیں ہوئے تو محمد شامی آپ کو آؤٹ کر دیں گے اور اگر شامی نہیں تو پھر جڈیجہ اور اگر آپ جڈیجہ سے بچ گئے تو کلدیپ آپ کو نہیں چھوڑیں گے۔

بھارتی گیند بازوں نے اس ورلڈ کپ میں اپنی کارکردگی سے سب کو حیران کر دیا ہے۔ محمد شامی نے گزشتہ چار میچوں میں 16 وکٹیں حاصل کیے ہیں جس میں دو مرتبہ پانچ پانچ وکٹیں حاصل کرنا بھی شامل ہے۔ جنوبی افریقہ کے خلاف میچ میں رویندرا جڈیجہ کا جادو چلا اور انہوں نے پانچ وکٹیں حاصل کیں۔ اس میچ میں تیز گیند باز محمد شامی اور کلدیپ یادو نے بھی دو دو وکٹیں حاصل کیں۔

قابل ذکر ہے کہ ورلڈ کپ 2023 کے اپنے پہلے میچ میں بھارتی ٹیم نے آسٹریلیا کو 200 سے بھی کم رنز پر آؤٹ کیا اور پھر دوسرے میچ میں اس نے پاکستان کو اس سے بھی کم رنز پر آؤٹ کیا۔ اس کے علاوہ سری لنکا، جنوبی افریقہ اور انگلینڈ کی ٹیمیں 100 سے کم رنز پر ڈھیر ہو چکی ہیں۔ جو بھارتی گیندبازی کی طاقت کو بیان کرنے کے لیے کافی ہے۔ پاکستان کے ایک سابق کھلاڑی نے تو آئی سی سی پر بھارتی گیند بازوں کی کارکردگی پر خصوصی گیندیں دینے تک کا الزام عائد کردیا ہے۔