ریٹین کے باوجود ہاردک پانڈیا کی ممبئی انڈینز میں واپسی کیسے ہوئی؟

گجرات ٹائٹنز کے لیے آئی پی ایل کا ٹائٹل جیتنے والے ہاردک پانڈیا کو آئی پی ایل 2024 کے لیے ریٹین کرنے کے بعد بھی ممبئی انڈینز نے ٹریڈ کرلیا ہے۔ کاغذی کارروائی میں تاخیر ہونے کی وجہ سے گجرات نے ہاردک کو ریٹین لسٹ میں رکھا تھا۔ ہاردک کے ممبئی میں جانے کے بعد اب گجرات ٹائٹنز کی کپتانی شبمن گل کو سونپ دی گئی ہے۔ Hardik Pandya returns to Mumbai Indians

ممبئی: گجرات ٹائٹنز نے اتوار کو اپنے کپتان ہاردک پانڈیا کو ریٹین لسٹ میں ڈال دیا تھا جس کے بعد ہاردک کے ممبئی میں واپسی کی قیاس آرائیاں ختم ہوگئی تھیں، لیکن اسی دوران پھر یہ خبر گردش کرنے لگی کی کاغذی کاروائی میں تاخیر ہونے کی وجہ سے ہاردک کو گجرات نے ریٹین لسٹ میں ڈال دیا ہے۔ لیکن جیسے ہی ممبئی اور گجرات کے درمیان یہ ڈیل مکمل ہوگئی ویسے ہی ہاردک ممبئی میں دوبارہ واپس چلے گئے۔

واضح رہے کہ انڈین پریمیئر لیگ (آئی پی ایل) کی 'ریٹینشن ونڈو' (کھلاڑیوں کو برقرار رکھنے کا وقت) اتوار کی شام 5 بجے بند کر دیا گیا تھا اور اس وقت گجرات ٹائٹنز نے اپنے آئی پی ایل کے فاتح کپتان کا نام ریٹین فہرست میں شامل کیا تھا جس کی وجہ سے سب حیران تھے۔

ذرائع کے مطابق ہاردک کا ٹریڈ اتوار کے روز شام 5 بجے کے بعد مکمل ہوا ہے۔ معاہدے کو اب باقاعدہ شکل بھی دے دی گئی ہے جس کی وجہ سے ہاردک اب ممبئی انڈینز میں واپس چلے گئے ہیں۔ ہاردک مکمل طور پر نقد ڈیل کے ذریعے ممبئی میں گئے ہیں۔ اس کے علاوہ ممبئی نے اپنے آل راؤنڈر کیمرون گرین کو آر سی بی کے ساتھ نقد سودے میں تجارت کیا ہے۔ کیمرون گرین کو ممبئی نے گزشتہ دسمبر میں نیلامی میں ₹17,50,00,000 میں خریدا تھا۔ نقد ڈیل کا مطلب یہ ہے کہ دونوں تجارت موجودہ کھلاڑیوں کی فیس کے مطابق کی گئی ہے۔

ہاردک پانڈیا کے ممبئی میں واپسی کے بعد اب گجرات ٹائٹنز کی کپتانی شبمن گل کو سونپ دی گئی ہے۔آل راؤنڈرہاردک نے گجرات کے ساتھ دو اہم سال گزارے اور 2022 میں گجرات کے ڈیبیو سیزن میں ٹائٹل بھی دلایا اور 2023 میں ایک سنسنی خیز فائنل میں آخری گیند پر شکست کے بعد گجرات رنر اپ رہی۔

ممبئی میں واپسی کے بعد ہاردک پانڈیا نے سوشل میڈیا پر پوسٹ شیئر کرکے اپنا پہلا ردعمل دیا ہے اور ہاردک نے لکھا کہ "یہ بہت سی شاندار یادوں کو واپس لاتا ہے، ممبئی پلٹن میں واپس آ کر بہت اچھا لگ رہا ہے۔ ہاردک نے ایک ویڈیو بھی شیئر کیا ہے جس پر مداح مسلسل ردعمل دے رہے ہیں۔

ہاردک کی ممبئی میں واپسی پر ٹیم مالک نیتا ایم امبانی نے کہا کہ ہم ہاردک کے گھر واپسی پر خوش آمدید کہتے ہوئے بہت پرجوش ہیں، یہ ہمارے ممبئی انڈینز کے خاندان کے لیے ایک جذباتی اتحاد ہے۔ آکاش امبانی نے کہا کہ ممبئی انڈینز میں ہاردک کو واپس دیکھ کر مجھے بہت خوشی ہوئی ہے۔ وہ جس بھی ٹیم میں کھیلتا ہے اسے بہترین توازن فراہم کرتا ہے۔ ایم آئی فیملی کے ساتھ ہاردک کا پہلا دور بہت کامیاب رہا اور ہمیں امید ہے کہ وہ اپنے دوسرے دور میں اور بھی زیادہ کامیابیاں حاصل کرے گا۔

گجرات کے ریٹین کھلاڑی: ابھینو سدرنگانی، بی سائی سدرشن، درشن نالکنڈے، ڈیوڈ ملر، جینت یادو، جوشوا لٹل، کین ولیمسن، میتھیو ویڈ، محمد شامی، موہت شرما، نور احمد، آر سائی کشور، راہل تیوتیا، راشد خان، شبھمن گل (کپتان)، وجے شنکر، ریدھیمان ساہا

ممبئی کے ریٹین کھلاڑی:آکاش مدھوال، ارجن تنڈولکر، دیوالڈ بریوس، ایشان کشن، جیسن بہرینڈورف، جسپریت بمراہ، کمار کارتیکیا سنگھ، تلک ورما، نہال وڈھیرا، پیوش چاولہ، روہت شرما، روماریو شیفرڈ (ٹریڈ)، شمس ملانی، سوریہ کمار یادو، ٹم ڈیوڈ، وشنو ونود، ہاردک پانڈیا (ٹریڈ)