ونڈیز پر اننگ کی شکست کا خطرہ

ویسٹ انڈیز پر جنوبی افریقہ کے خلاف پہلے کرکٹ ٹیسٹ میچ کے دوسرے روز اننگ کی ہارکا خطرہ منڈلانے لگا ہے۔ ونڈیز نے پہلی اننگ میں 225 رن کے بڑے فرق سے پیچھے رہنے کے بعد دوسری اننگ میں اسٹیمپ تک اپنے چاروکٹ 82 رن پر گنوادئے ہیں اوراسے اننگ کی شکست سے بچنے کے لئے ابھی مزید 143 رن بنانے ہیں۔

ویسٹ انڈیز کو پہلے روز پہلی اننگ میں محض 97 رن پرڈھیر کرنے کے بعد جنوبی افریقہ نے اسٹیمپ تک چار وکٹ کے نقصان پر 128 رن بنالئے تھے۔ اسٹیمپ کے وقت ریسی وان ڈیر ڈوسین 34 اور وکٹ کیپر کونٹن ڈی کاک چاررن بناکر کریز پرتھے۔

ڈوسین 46 رن بناکر آوٹ ہوئے جبکہ ڈی کاک نے 170 گیندوں میں 12 چوکوں اورسات چھکوں کی مددسے ناٹ آوٹ 141 رن بناکر جنوبی افریقہ کو 225 رن کی مضبوط برتری دلادی۔

ویان ملڈر نے کارآمد 25 رن بنائے۔ ونڈیز کی طرف سے سابق کپتان جیسن ہولڈر نے 75 رن پر چاروکٹ اورجیڈن سیلس نے 75 رن پرتین وکٹ لئے۔

ونڈیز کی دوسری اننگ میں کیگیسوربادا اوراینرک نورتجے نے دو-دووکٹ نکال کر ونڈیز کو دباومیں لادیا۔ اسٹیمپس کے وقت روسٹن چیز 21 اورجرمین بلیک ووڈ 10 رن بناکر کریز پر موجودتھے۔

یو این آئی