اترپردیش: پاکستانی ٹیم کی ٹی شرٹ بنی نوجوان کے لیے وبالِ جان

ریاست اترپردیش کے ضلع اناؤ کے ماکھی تھانہ علاقے کے بندا کھیڑا گاؤں میں ایک نوجوان کی ٹی شرٹ اس وقت موضوع بحث بن گئی جب لوگوں نے دیکھا کہ اس ٹی شرٹ پر لفظ 'پاکستان' لکھا ہے۔

بندا کھیڑا گاؤں کے لوگوں نے جیسے ہی دیکھا کہ ایک نوجوان نے لفظ پاکستان لکھی ہوئی ٹی شرٹ پہنی ہے تب انہوں نے ٹی شرٹ اتروا کر اسے(ٹی شرٹ) جلا دیا۔

تفصیلات کے مطابق ماکھی تھانہ کے بندا کھیڑا گاؤں کے 19 سالہ نوجوان نے ہلکے سبز رنگ کی ٹی شرٹ پہنی تھی جس پر پاکستان لکھا ہوا تھا۔ اس کے بعد یہ بات پورے گاؤں میں آگ کی طرح پھیل گئی اور ہنگامہ برپا ہوگیا۔

ہنگامے کے بعد پولیس موقع پر پہنچی اور نوجوان کو حراست میں لے کر پوچھ تاچھ کر رہی ہے۔

اس تعلق سے تھانہ انچارج پون کمار سونکر نے بتایا کہ نوجوان کا کوئی رشتہ دار ممبئی میں رہتا ہے اسی نے یہ ٹی شرٹ اسے دی تھی جبکہ اس معاملے میں کسی بھی قسم کی ملک مخالف سرگرمی کی بات نہیں ہے۔