شعیب اختر کی افغان کرکٹ سی ای او پر نکتہ چینی

گزشتہ روز افغانستان کرکٹ بورڈ کے چیف ایگزیکٹیو افسر ( سی ای او) اسداللہ کے بیان پر پاکستان کے سابق تیز گیند باز شعیب اختر نے تنقید کرتے ہوئے انہیں کامیڈی کرنے کا مشورہ دے دیا۔

افغان کرکٹ بورڈ کے چیف اسد اللہ نے گزشتہ روز پاکستان سے کہا تھا کہ وہ افغانستان سے کرکٹ سیکھے، جس پر شعیب اختر نے کہا کہ وہ کامیڈین کا کام زیادہ اچھے انداز میں کرسکتے ہیں، ان کی ناقص کرکٹ مینجمنٹ کے اثرات عالمی کپ میں افغان ٹیم کی کارکردگی پر بھی پڑے ہیں۔

واضح رہے کہ اسد اللہ نے ایک انٹرویو میں عالمی کپ کے دوران افغانستان ٹیم کی کارکردگی کو پاکستانی ٹیم سے کہیں زیادہ بہتر قرار دیتے ہوئے کہا تھا کہ پاکستان کو چاہیے کہ وہ اپنے ملک میں کرکٹ کا معیار بہتر بنانے کے لیے افغانستان سے ٹیکنیکل، کوچنگ اور دیگر تعاون کی درخواست کرے۔