پاک ۔ نیوزی لینڈ سیریز میں تماشائیوں کی موجودگی دکھائی دے گی

پاکستان اور نیوزی لینڈ کے درمیان سیریز تماشائیوں کی موجودگی میں کھیلی جائے گی۔ پاکستان اور نیوزی لینڈ کے مابین سیریز کے دوران تماشائیوں کی رونقیں لانے کے مقصد سے ٹکٹوں کی فروخت کا آغاز کر دیا گیا ہے۔

کورونا وائرس کے بعد نیوزی لینڈ میں ہونے والی پہلی انٹرنیشنل سیریز نومبر میں ہوگی جس میں ویسٹ انڈیز کی ٹیم 3 ٹی ٹوئنٹی اور 2 ٹیسٹ میچ کھیلے گی۔

بعد ازاں پاکستان ٹیم 18، 20 اور 22 دسمبر کو 3 ٹی ٹوئنٹی میچوں کے بعد 2 ٹیسٹ بھی کھیلے گی۔پہلا میچ 26 دسمبر اور دوسرا 3 جنوری سے شروع ہوگا۔

ابھی تک انگلینڈ میں ہونے والے انٹرنیشنل میچ تماشائیوں کے بغیر منعقد ہوئے ہیں، زمبابوے کے خلاف پاکستان کی ہوم سیریز میں بھی اسٹینڈز خالی ہوں گے، کورونا پر قابو پانے والے پہلے ملک نیوزی لینڈ کے کرکٹ اسٹیڈیم میں تماشائیوں کا شور اور تالیوں کی گونج سنائی دے گی جبکہ ویسٹ انڈیز اور پاکستان کے خلاف سیریز کیلئے ٹکٹوں کی فروخت کا آغاز کردیا گیا ہے۔