نیوزی لینڈ نے پاکستان کو شکست دے کر سیریز پر قبضہ کیا

سلامی بلے باز ٹم سیفرٹ کی ناٹ آوٹ 84 رنز اور کپتان کین ولیمسن کے ناٹ آوٹ 57 رنز کی اننگز کی بدولت نیوزی لینڈ نے پاکستان کو دوسرے ٹی-20 مقابلے میں شکست دیتے ہوئے تین میچوں کی سیریز میں دو۔ صفر کی ناقابل تسخیر سبقت حاصل کرلی۔

پاکستان نے ٹاس جیت کر پہلے بلے بازی کرتے ہوئے محمدحفیظ کی 57 گیندوں میں پانچ چھکوں اور دس چوکوں کی مدد سے بہترین 99 رنز کی اننگز کی بدولت 20 اوور میں نیوزی لینڈ کے سامنے 9 وکٹ پر 163 رن کا مضبوط اسکور بنایا۔

پاکستان کا دیگر کوئی بلے باز خاص کارکردگی نہیں کرسکا، نیوزی لینڈ کی طرف سے تجربہ کار تیز گیند باز ٹم ساؤتھی نے شاندار کارکردگی کا مظاہرہ کرتے ہوئے چار اوور میں 21 رنز دے کر چار وکٹ حاصل کیے، ٹم ساؤتھی کو شاندار گیندبازی کے لیے پلیئر آف دی میچ کا خطاب دیا گیا۔

ہدف کا تعاقب کرتے ہوئے نیوزی لینڈ کی ٹیم کی جانب سے سلامی بلے باز سیفرٹ نے تین چھکے اور آٹھ چوکوں کی مدد سے ناٹ آوٹ 84 رنز بنائے اور اپنے بچے کی پیدائش کے لیے چھٹی لینے کے بعد ٹی-20 سیریز میں کھیل رہے کپتان ولیمسن نے اپنی فارم جاری رکھتے ہوئے ایک چھکے اور آٹھ چوکوں کی مدد سے ناٹ آوٹ 57 رنز بنائے۔

ٹیم نے 19.2 اوور میں ایک وکٹ پر 163 رنز بناکر میچ جیت کر سیریز دو-صفر سے اپنے نام کرلی، اس کے علاوہ مارٹن گپٹل نے 11 گیندوں پر 22 رنز بنائے۔

پاکستان کی جانب سے وکٹ کیپر بلے باز محمدرضوان نے 22، حیدرعلی نے 8، عبداللہ شفیق نے صفر، کپتان شاداب خان نے 4، خوش دل شاہ نے 14، فہیم اشرف نے چار اور عماد وسیم نے ناٹ آوٹ دس رن بنائے۔

وہیں نیوزی لینڈ کی طرف سے جیمس نیشم نے دو اوور میں دس رن دے کر ایک وکٹ اور سوڈھی نے تین اوور میں 21 رن دے کر ایک وکٹ حاصل کیا۔

(یو این آئی)