پاکستان کے دورہ انگلینڈ کا یادگار لمحہ

انگلینڈ کرکٹ ٹیم کے سابق کپتان ناصر حسین نے پاکستانی کرکٹ ٹیم کی تعریفوں کے پل باندھتے ہوئے ان کے انگلینڈ دورے کو قابل مبارکباد کہا۔

انگلینڈ کرکٹ ٹیم کے سابق کپتان ناصر حسین نے کہا کہ پاکستان اور انگلینڈ کے درمیان سیریز کا بہترین لمحہ وہ تھا جب پاکستانی کھلاڑیوں نے ڈبل سنچری بنانے والے انگلش بلے باز زیک کرولی کی حوصلہ افزائی کی جبکہ کورونا وائرس کی عالمی وبا کے دوران پاکستانی ٹیم نے انگلینڈ ٹور کرکے شاندار مثال قائم کردی۔

پی سی بی ڈیجیٹل سے گفتگو کے دوران شین وارن، مائیکل ہولڈنگ، مائیکل ایتھرٹن اور ایشا گوہا نے بھی انگلینڈ اور پاکستان سیریز کے یادگار لمحات پر تبصرہ کرتے ہوئے واضح کیا کہ سیریز کا اختتام بہت اچھے ماحول میں ہوا اور انہیں پاکستانی ٹیم کو انگلینڈ میں کھیلتے دیکھ کر بہت اچھا لگا۔

مائیکل ہولڈنگ نے کہا کہ 'نوجوان پاکستانی فاسٹ بالرز شاہین آفریدی اور نسیم شاہ کی عمر یکجا کرنے پر بھی جیمس اینڈرسن سے کم ہے لیکن پورا یقین ہے کہ وہ مستقبل میں پاکستانی ٹیم کیلئے ایک اثاثہ ثابت ہو سکتے ہیں۔