مائیکل کاسپروز کرکٹ آسٹریلیا کے اہم عہدے سے مستعفی

سابق فاسٹ بالر مائیکل کاسپروز نے آسٹریلیائی کرکٹ کے لیے نیک خواہشات کا اظہار کرتے ہوئے استعفیٰ دیا ہے۔

کرکٹ آسٹریلیا (سی اے) کے چیئرمین ارل ایڈنگز نے تصدیق کرتے ہوئے کہا کہ مائیکل کاسپروز نے گزشتہ روز کرکٹ آسٹریلیا کے نان ایگزیکٹو ڈائریکٹر کے عہدے سے استعفی دے دیا ہے۔

کرکٹ آسٹریلیا نے کہا ہے کہ سابق فاسٹ بالر مائیکل کاسپروز نے آسٹریلوی کرکٹ کے لیے نیک خواہشات رکھتے ہوئے استعفیٰ دیا ہے۔

اڑتالیس سالہ سابق فاسٹ بالر مائیکل کاسپروز کے عہدے کی مدت آئندہ برس مکمل ہورہی تھی۔ مائیکل کاسپروز آسٹریلیا کے سابق فاسٹ بالر رہے ہیں اور ان کی رخصتی کے ساتھ ہی آسٹریلوی بورڈ میں اب کوئی مرد ٹیسٹ کھلاڑی باقی نہیں بچا ہے۔

سابق فاسٹ بالر مائیکل کاسپروز نے اپنے ایک بیان میں کہا کہ 'جیسا کہ میں نے میدان میں کیا، مجھے یقین ہے کہ میں نے اس پوزیشن کو قطعی طور پر وہ سب کچھ دیا ہے جتنا میں اس کے بارے میں جانتا تھا'۔

انہوں نے کہا کہ 'گذشتہ برسوں میں مجھے ملک میں کرکٹ کے ہر اسٹیک ہولڈر کی نمائندگی کرنے کا موقع ملا ہے اور یہ تجربہ میرے لیے ایک اعزاز ہے'۔

اپنے عہدے کے حوالے سے سابق فاسٹ بالر مائیکل کاسپروز نے کہا کہ 'اپنا عہدہ چھوڑنے کے لیے یہ بالکل صحیح وقت ہے، میں اپنی ملازمت کے دوران ان تمام ساتھیوں کا شکر گزار ہوں جنہوں نے میرے ساتھ مل کر کام کیا'۔

اس تعلق سے کرکٹ آسٹریلیا کے چیئرمین ارل ایڈنگز نے مزید کہا کہ مائیکل کاسپروز سابق بین الاقوامی کھلاڑی، اے سی اے صدر، کوئنز لینڈ کرکٹ کے عبوری سی ای او اور بورڈ کے ممبر کی حیثیت سے آسٹریلوی کرکٹ کے خادم رہے ہیں۔

ارل ایڈنگز نے یہ بھی کہا کہ 'مائیکل کاسپروز کرکٹ فیملی کے دیرینہ رکن ہیں اور ہم ان کے تعاون پر ان کا شکریہ ادا کرتے ہیں'۔