پاکستان کرکٹ ٹیم کے کوچ مصباح الحق کے بعد خالی ہونے والے چیف سلیکٹر کے عہدے پر تبادلہ خیال کرتے ہوئے 52 سالہ راشد لطیف نے یوٹیوب چینل پر کہا کہ تنازعات تو رہتے ہی ہیں لیکن مسائل سے بچنے کے لیے بہتر یہی ہے کہ آپ کسی خاتون کرکٹر کو اعلیٰ عہدہ دے دیں۔
راشد لطیف نے کہا کہ سب سے بہتر تو یہی ہے کہ ثنا اور عروج کو ہی چیف سلیکٹر بنا دیں، پھر تو کوئی مسئلہ ہی نہیں ہوگا۔
انھوں نے مزید کہا کہ ہمارے بورڈ کے آئین میں کیوں چیئرپرسن کے بجائے صرف چیئرمین پر زور دیا گیا۔ ایک خاتون بھی بورڈ میں ٹاپ پوزیشن سنبھال سکتی ہے، جو آئین بناتے ہیں انھیں اس جانب بھی توجہ دینے کی ضرورت ہے۔ کیوں خاتون کرکٹرز کردار ادا نہیں کر سکتیں۔
میرے خیال سے تو بہتر یہی ہے کہ خاتون کرکٹرز کو ہی اعلیٰ عہدے دے دیا جائے تاکہ وہ مردوں اور خواتین کو خود دیکھیں۔
بتا دیں کہ پاکستان کرکٹ ٹیم کے کوچ مصباح الحق نے گذشتہ روز پاکستان کرکٹ ٹیم کے چیف سلیکٹر کے عہدے سے استعفی دے دیا تھا۔
